spurningar og framkvæmd

Spurningalistinn var hannaður af stýrihópi um sjálfsmat. Spurningalistinn sem lagður var fyrir foreldra skiptist í meginatiðum í þrjá hluta (fylgiskjal 1). Fyrstu sjö spurningarnar snúast um Matartorg.is, næstu ellefu spurningar um matinn sjálfan, verð á hádegismat og morgunhressingu en síðasti hlutinn eru viðhorfaspurningar um matsölu til unglinganna. Spurningarnar sem lagðar voru fyrir nemendur í 1. –7. bekk (fylgiskjal 2) snúa fyrst og fremst að matnum og auk þess voru spurningar um matsöluna lagðar fyrir nemendur á unglingastigi (fylgiskjal 3).

Outcome Kannanir sáu um að senda spurningalista til foreldra með netpósti og jafnframt að taka helstu niðurstöður saman í skýrslu (fylgiskjal 4). Spurningar sem lagðar voru fyrir nemendur voru í flestum tilvikum lagðar fyrir af umsjónarkennara. Alls tóku 541 nemandi þátt í könnuninni og 305 foreldrar. Spurningalistinn var upphaflega sendur til 587 foreldra/forráðamanna og var svarhlutfall þeirra því 52% og svarhlutfall nemenda 90%.

Svörin við spurningum nemenda voru færðar inn í SPSS tölfræðiforritið og unnið úr þeim þar. Niðurstöður eru líklega áreiðanlegar, m.a. vegna þess að spurningalistinn var ekki mjög langur og sami aðilinn vann úr öllum svörunum. Breyturnar í spurningalistanum voru mældar á raðkvarða og gefa möguleika á að fylgni sé skoðuð tvíhliða. Sjá nánar í tíðnitöflum (fylgiskjal 5).

niðurstöður

Kaflinn um niðurstöður skiptist í fjóra hluta þ.e. Matartorg, mat, matsölu til unglinga og annað. Í hverjum kafla er búið að taka saman helstu niðurstöður spurninganna. Á myndum sem fylgja spurningunum eru sett saman viðhorf nemenda og foreldra þar sem það á við.

matartorg

Sjö spurningar tengdust Matartorginu á einn eða annan hátt. Niðurstöður birtast hér á eftir í þeirri röð sem þær voru lagðar fyrir. Fyrst kemur spurningin, síðan upptalning á helstu niðurstöðum og þar á eftir skýringarmynd með spurningum sem voru á raðkvarða.

Ertu ánægð(ur) með þá nýjung að Matartorgið sé notað til að halda utan um skráningar í mataráskrift?

Langflestir eða 88,1% (275) voru frekar ánægðir eða mjög ánægðir með nýjungina að halda utan um matarpantanir á Netinu. Hvorki ánægðir né óánægðir voru 8,2% (25) og frekar óánægðir voru 1,6% (5). Enginn svarenda taldi sig vera mjög óánægðan.

Ertu ánægð(ur) með að geta valið úr dögum sem barnið þitt getur verið í mataráskrift?

Þegar litið er á hvort foreldrar séu ánægðir að geta valið úr dögum á Matartorginu kemur í ljós að langflestir eða 95% (298) eru mjög ánægðir eða frekar ánægðir. Hvorki ánægðir né óánægðir eru 4,2% (13) og einungis tveir einstaklingar eru frekar óánægðir.

Ertu ánægð(ur) með að geta gengið frá mataráskriftinni á Netinu?

Þegar spurt var hvort foreldrar/forráðamenn væru ánægðir með að geta gengið frá mataráskriftinni á Netinu kom eindregin ánægja fram. Mjög ánægðir eða frekar ánægðir eru 97,3% foreldra/forráðamanna og einugis 2,6% (8) eru annarrar skoðunar.

Ertu ánægð(ur) með hvernig þér hefur gengið að skrá áskriftina á Matartorginu?

Til þess að afla upplýsinga um hversu vel eða illa foreldrum/forráðamönnum gangi með sjálfa skráninguna á Matartorginu var ákveðið að spyrja nánar um það. Niðustaðan gefur til kynna að ánægjan sé nokkuð almenn en 87,8% eru mjög ánægð eða frekar ánægð með hvernig þeim tekst til við skráninguna og 10,6% (32) eru hvorki ánægðir né óánægðir. Einungis fimm einstaklingar lýsa yfir óánægju.

Hver finnst þér vera hæfileg lengd á áskriftartímabilum?

Eitt af því sem mikilvægt er að kanna er hversu langan tíma í senn er hæfilegt að hafa tímabilin. Segja má að svarendur skiptist í tvennt í afstöðu sinni en 35,5% telja einn mánuð vera hæfilegan og 44% telja tvo mánuði hæfilega. Tæp 6% (18) telja þrjá mánuði hæfilega og tæp 10% (28) að skipta eigi skólaárinu í tvö áskriftartímabil. Enn aðrir nefna aðra kosti eins og sex vikur og tvo til þrjá mánuði.

Hver finnst þér vera helsti kosturinn við að nota Matartorgið?

Foreldrar/forráðamenn voru beðnir um að nefna helstu kostina við að nota Matartorgið. Um opna spurningu var að ræða þannig að þátttakendur skráðu helstu kostina en ekki var boðið upp á að merkt væri við fyrirfram ákveðna valkosti. Svörin sem bárust við spurningunni voru 222. Svörin voru öll jákvæð nema eitt. Helst var nefnt að Matartorgið væri auðvelt og þægilegt. Það væri gott að sleppa við að koma í skólann til að ganga frá áskrift og tekið var fram að það væri mikill kostur að geta valið um daga og máltíðir.

Hver finnst þér vera helsti gallinn við að nota Matartorgið?

Þegar þátttakendur voru beðnir um að nefna helstu gallana við Matartorgið bárust 173 svör. Þar af voru 132 sem beinlínis vörðuðu spurninguna og þar af voru 106 sem tóku fram að þeir teldu engan galla á Matartorginu. Önnur svör voru: Galli að Matartorgið sé ekki beintengt netbanka/ banka (10). Erfitt að halda utan um lykilorð og eingöngu hægt að fá nýtt lykilorð á skrifstofutíma (6). Galli að ekki sé hægt að fá undanþágu þegar frestur til skráningu er liðinn (3). Galli að það kemur ekki staðfesting t.d. um að skráning hafi heppnast (4). Galli að það er ekki hægt að leiðrétta séu mistök gerð við skráningu (3).

matur

Tólf spurningar sem tengdust matnum voru lagðar fyrir foreldra og alla nemendur skólans. Spurt var um bragð, næringargildi, framboð á ávöxtum og grænmeti, stærð rétta, matseðil, verð og morgunhressingu. Orðalag spurninganna var ekki alltaf eins og stundum voru foreldrar beðnir um að meta hvert þeir teldu viðhorf barnanna sinna vera og niðurstöðurnar síðan bornar saman. Gerð er grein fyrir niðurstöðum undir hverri spurningu, þ.e. bæði foreldra/forráðamanna og nemenda.

Til einföldunar við framsetningu hafa verið teknir út aukastafir í hlutfallstölum á myndum og þegar greint er frá niðurstöðum. Þetta veldur því að hlutfallstölurnar eru ekki alltaf nákvæmlega 100% þegar þær eru lagðar saman. Nákvæmar upplýsingar um hlutfallstölur er að finna í fylgiskjölum nr. 4 og 5.

Hversu ánægt/ánægð telur þú barnið/börnin þitt/þín vera með fjölbreytni réttanna?

Nemendur og foreldrar/forráðamenn voru spurðir út í ánægju með fjölbreytni rétta. Foreldrar/forráðamenn voru beðnir um að meta hvert þeir teldu viðhorf barna sinna vera en nemendur spurðir hvað þeim fyndist. Þegar svör foreldra/forráðamanna og nemenda eru borin saman kemur fram að matið er í meginatriðum sambærilegt. Þótt fram komi munur í súluritinu er munurinn óverulegur þegar ánægjan er lögð saman, þ.e. valmöguleikarnir mjög ánægður og frekar ánægður. Þá kemur þá í ljós að 65% foreldra/forráðamanna telja börnin sín ánægð og 64% nemenda eru ánægð eða mjög ánægð með fjölbreytni réttanna á matseðlinum.

Ertu ánægð(ur) með fjölbreytni rétta á matseðlinum?

Spurningunni um fjölbreytni rétta var einnig beint að foreldrunum. Þar koma fram mjög álíka svör en örlítið fleiri eru ánægðir með fjölbreytni rétta en þeir telja börnin sín vera. Svör foreldra/forráðamanna borin saman við svör nemenda eru áþekk. 67% foreldra/forráðamann og 64% nemenda eru mjög ánægð eða frekar ánægð með fjölbreytni rétta á matseðlinum. Nánast sama hlutfall er hvorki ánægður né óánægður með fjölbreytni rétta eða 23% foreldra/forráðamanna og 26% nemenda. 9% nemenda og 11% foreldra/forráðamanna eru óánægð með fjölbreytni rétta á matseðlinum.

Ertu ánægð(ur) með framboð af ávöxtum á matseðlinum?

Sama spurningin var lögð fyrir foreldra/forráðamenn og nemendur þegar spurt var um framboð af ávöxtum. Nemendur eru ívið ánægðari en foreldrar/forráðamenn þeirra. 55% nemenda eru ánægðir eða frekar ánægðir með framboð á ávöxtum á meðan að 44% foreldra/forráðamanna eru ánægð með framboð á ávöxtum. 37% foreldra eru hvorki ánægðir né óánægðir og 27% nemenda. Aðrir eru frekar óánægðir eða mjög óánægðir.

Ertu ánægð(ur) með framboð af grænmeti á matseðlinum?

Sama spurningin var lögð fyrir alla þátttakendur. 40% nemenda eru mjög ánægðir eða frekar ánægðir og 43% foreldra. 39% foreldra eru hvorki ánægðir né óánægðir og um það bil 20% foreldra og nemenda eru óánægð.

Ertu ánægð(ur) með bragðgæði réttanna á matseðlinum?

Nemendur voru spurðir beint um bragðgæði réttanna á matseðlinum. Foreldrar/forráðamenn voru beðnir um að meta hversu ánægt eða ánægð þeir teldu börnin sín vera með bragðgæði réttanna. Þegar niðurstöðurnar eru skoðaðar má sjá að foreldrar telja börnin sín ánægðari með matinn en nemendur sjálfir. 72% foreldra/forráðamanna telja börnin sín mjög ánægð eða ánægð en 59% nemenda segjast vera ánægðir með bragðgæðin. 19% foreldra/forráðamanna segjast hvorki ánægð né óánægð og 26% nemenda. Um 10% svarenda eru óánægðir.

Ertu ánægð(ur) með stærð matarskammtanna?

Nemendur voru spurðir hvort þeir væru ánægðir með stærð matarskammtanna. Foreldrar/forráðamenn voru beðnir um að meta hvort þeir teldu að börnin þeirra væru ánægð með stærð matarskammtanna. Eins og varðandi bragðið telja foreldrar/forráðamenn börn sín ánægðari en þau í raun eru. 70% foreldra/forráðamanna telja börn sín ánægð með stærð matarskammtanna en 57% nemenda segjast vera ánægðir með stærð matarskammtanna. Nákvæmlega jafn stórt hlutfall foreldra/forráðamanna og nemenda eru hvorki ánægðir né óánægðir. 21% nemenda eru óánægðir með stærð matarskammtanna.

Hvað rétti finnst þér vanta á matseðilinn (nefndu einn til þrjá)?

Allir þátttakendur voru beðnir um að nefna þá rétti sem þeir vildu bæta á matseðilinn. Margir þeirra rétta sem voru nefndir eru þegar á matseðlinum en mjög margir þátttakenda vildu sjá meira af ákveðnum réttum á matseðlinum. Hér fyrir neðan hafa verið teknir saman þeir réttir sem oftast voru nefndir af þátttakendum. Pizza var langoftast nefnd hjá nemendum og grænmetisréttir/heilsuréttir hjá foreldrum/forráðamönnum.

Réttir	Nemendur	Foreldrar
Grænmeti/grænmetisréttir/heilsuréttir	15	27
Mexíkóskir réttir	19
Kjúklingur	60	10
Hamborgarar	35
Pizza	128
Fiskur/fiskbollur	6	18
Pastaréttir	7
Kínamat	19
Grjónagrautur/makkarónugrautur	7
Lambakjöt – óunnið kjöt	5	24
Langlokur/,,Subway”	18
Samtals	319	79

Hvaða réttir finnst þér alls ekki eiga að vera á matseðlinum?

Öllu færri réttir voru nefndir þegar þátttakendur voru beðnir um að nefna hvaða rétti þeim þætti alls ekki heima á matseðlinum. Unnar kjötvörur voru áberandi oftast nefndar hjá foreldrum/forráðamönnum og fiskur hjá nemendum.

Réttir	Nemendur	Foreldrar
Unnar kjötvörur	9	53
Kakósúpa	12	25
Fiskur	46	5
Djúpsteiktur matur	12
Plokkfiskur	27
Lasagna	16
Grjónagrautut/makkarónugrautur	9
Samtals	131	83

Ertu ánægð(ur) með næringargildi réttanna á matseðlinum?

Spurning varðandi næringargildi rétta var aðeins lögð fyrir foreldra/forráðamenn og ekki fyrir nemendur. Nákvæmlega 50% foreldra/forráðamanna eru mjög ánægð eða frekar ánægð með næringargildi réttanna á matseðlinum. 35% eru hlutlaus og 16% eru óánægð.

Matsala

Allir foreldrar/forráðamenn voru spurðir út í matsölu mötuneytisins þótt matsalan sé fyrst og fremst þjónusta við nemendur á unglingastigi. Eingöngu nemendur á unglingastigi svöruðu spurningum um matsöluna.

Hversu ánægð(ur) ertu með fjölbreytni varnings í matsölunni?

Nánast samdóma álit foreldra/forráðamanna og nemenda í unglingadeild endurspeglast í svörum.

Hversu ánægð(ur) ertu með að boðið sé upp á sætabrauð í matsölunni?

Mun meira ber í milli þegar foreldrar/forráðamenn og unglingar eru spurðir um álit þeirra á á sætabrauði í matsölunni. 66% nemenda eru ánægðir með fyrirkomulagið en aðeins 14% foreldra. 30% foreldra og 21% nemenda eru hlutlausir en 56% foreldra eru óánægðir en aðeins 13% nemenda.

Hvað rétti finnst þér vanta í matsöluna (nefndu einn til þrjá)?

Nokkuð var um að svarendur nýttu tækifærið að nefna þá rétti sem þeim þætti að ættu að vera í boði í matsölunni. Unglingar og foreldrar/forráðamenn voru sammála um að bæta mætti við hollusturéttum á borð við grænmetis- eða ávaxtabakka. Nánari upplýsingar í töflunni hér fyrir neðan.

Réttir	Nemendur	Foreldrar
Grænmetis/ávaxtabakka	10	10
Súpur		5
Skyr	2	5
Samlokur		10
Fjölbreyttara úrval af brauði	8
Ávexti	6
Kleinuhringi	6
Samtals	32	30

Hvaða réttir finnst þér alls ekki eiga að vera í boði í matsölunni?

Viðhorf foreldra til rétta sem að þeirra mati eiga alls ekki að vera í boði í matsölunni var afgerandi. 52 nefndu að ekki ætti að bjóða upp á sætabrauð í matsölunni. Nokkrir nefndu að það væri góð hugmynd að hafa sætabrauð í boði t.d. einn dag í viku.

14 unglingar voru sammála varðandi sætabrauðið og vilja ekki að það sé í boði í matsölunni. Nokkrir nefndu Billy´s pizzu og finnst hún ekki boðleg.

Annað

Til viðbótar við Matartorgið og eiginlegra spurninga um matinn og matseðilinn, var spurt um verð á hádegisverði og morgunhressingu. Einnig gafst bæði nemendum og foreldrum/forráðamönnum kostur á að nefna til sögunnar einhver atriði sem þeir teldu að skipti máli. Í þessum kafla verður gerð grein fyrir helstu niðurstöðum.

Hversu ánægð(ur) ertu með verð á hádegisverðinum?

Þegar foreldrar/forráðamenn voru spurðir um verð á hádegisverðinum kom í ljós að 65% eru mjög ánægðir eða frekar ánægðir. 25% eru hlutlausir og 11% frekar ánægðir. Enginn telur sig vera mjög óánægðan.

Hversu ánægð(ur) ertu með verð á morgunhressingunni?

Töluvert ólík niðurstaða blasir við þegar spurt er um verð á morgunhressingunni. 42% eru mjög ánægðir eða frekar ánægðir með verðið en 53% eru hlutlausir. 5% eru óánægðir.

Eitthvað annað sem þú vilt koma á framfæri?

Hér hafa verið tekin saman nokkur atriði sem foreldrar/forráðamenn nefndu í lokin. Athugasemdirnar urðu fyrir valinu vegna þess að þær endurspegla viðhorf einstakra foreldra til atriða sem ekki var beinlínis spurt um í spurningalistanum. Öll atriðin sem nefnd voru er að finna í fylgiskjali 4.

n Já ég er ekki hress með að það skuli vera drukkin mjólk með heitum mat - það er ekki samkvæmt manneldisráði held ég þar sem mjólkin hindrar frásog járns úr fæðunni.

n Almennt finnst mér matseðillinn fjölbreyttur og sæmilega hollur. Það þarf náttúrulega að spila saman, smekkur barnanna og hollusta, en t.d. held ég að þau borði frekar hollan minna spennandi mat í skólanum heldur en heima, því þau eru orðin svo svöng í hádeginu að þau frekar borða það sem fyrir þau er lagt. Pizza og pylsur ættu ekki að vera á listanum svo ég tali nú ekki um hamborgara og djúpsteiktan mat.

n Ávextirnir mættu veru ferskari, eru stundum skemmdir.

n Að eldað sé á staðnum.

n Að hafa manneldismarkmið að leiðarljósi við gerð matseðils. Ég vildi gjarnan borga aðeins meira og fá hollari mat fyrir barnið mitt.

n Best væri að hafa aðstöðu fyrir kokk eða matráðskonu í skólanum og það er ótrúlegt að í svona nýjum skóla sé ekki gert ráð fyrir slíkri aðstöðu. Þá væri hægt að framleiða mun meira af ferskum mat og réttum fyrir börnin í staðinn fyrir að kaupa tilbúinn mat frá öðrum aðilum. Væri ekki möguleiki á því að koma upp slíkri aðstöðu?

n Ég myndi gjarnan vilja að barnið mitt hefði aðgang að matsölunni til að kaupa sér eitthvað létt á sanngjörnu verði þá daga sem hún er ekki í mat. Barnið mitt er í 6. bekk og má það ekki fyrr en hún kemst á unglingastigið.

n Ég vil þakka Lindaskóla fyrir að vera í farabroddi með þjónustu eins og Matartorg.is. Í því hraða þjóðfélagi þá hjálpar torgið mér að passa upp á að gleyma ekki næringu og nesti barna minna.

n Er reiðubúin að borga heldur meira fyrir hollari mat. Finnst reyndar að þetta eigi að vera innifalið í skattpeningunum eins og í nágrannalöndunum, á þann hátt væri hægt að tryggja öllum börnum eina máltíð á dag.

n Flott væri að fá nánari lýsingar á innihaldi matarréttanna, næringargildi o.þ.h.

n Hafa ávexti í morgunmat sem þau eiga auðvelt með að borða hafa ekki getu til að skræla appelsínu né borða heilt epli á engum tíma kvarta yfir að ekki sé nógur tími til að borða.

n Kvartað er yfir á mínu heimili langri röð í matsalnum þegar verið er að bíða eftir matnum og að stundum sé eitthvað búið eins og t.d. steiktur laukur þegar það eru pylsur.

n Mætti vera val á milli 2ja rétta í hádegi.

n Meiri systkinaafsláttur.

n Mér finnst sjálfsagt að þau börn sem ekki velja mat alla daga geti fengið mjólk með nestinu sínu eins og þau sem eru í mat.

n Þetta tengist reyndar ekki matnum heldur matartímanum. Sonur minn hefur margsinnis kvartað yfir hávaða og látum í matartímanum og hefur nefnt að eldri krakkar eru með yfirgang gagnvart yngri krökkum þ.e. reyna að taka frá þeim pláss við matarborðin. Hann hefur einnig kvartað yfir fjöldanum og langri röð við að fá matinn sinn. Er ekki hægt að hafa fleiri matartíma með þá færri krökkum í einu

Aðgerðaáætlun

Þessi kafli skiptist í tvo undirkafla. Fyrri kaflinn heitir ,,viðmið” þar sem sett eru fram viðmið um niðurstöðurnar. Í síðari kaflanum ,,viðbrögð” eru lagðar fram hugmyndir um viðbrögð og aðgerðir út frá niðurstöðum. Stýrihópur um sjálfsmat fer yfir hugmyndir um viðbrögð og framkvæmir betrumbætur á þann hátt sem hópurinn telur koma sér best fyrir skólastarfið.

Viðmið

Hér eru niðurstöður könnunarinnar flokkaðar eftir viðhorfi. Gert er ráð fyrir að þar sem 90% eða fleiri eru mjög ánægðir, ánægðir eða hlutlausir sé ekki ástæða til þess að grípa til aðgerða heldur sé hægt að una vel slíkri niðurstöðu. Niðurstöður þeirra spurninga sem ekki er hægt að flokka með skýrum hætti eru útskýrðar í niðurstöðum og gefin umsögn um ástæðu til framkvæmda. Í töflunni hér fyrir neðan eru niðurstöðurnar flokkaðar skv. því viðmiði.

Flokkur	Spurt var um	Niðurstaða	Umsögn
Matartorg	Ertu ánægð(ur) með þá nýjung að Matartorgið sé notað til að halda utan um skráningar í mataráskrift?	Yfir 90% mjög ánægðir, ánægðir eða hlutlausir í afstöðu sinni.	Mjög gott.
	Ertu ánægð(ur) með að geta valið úr dögum sem barnið þitt getur verið í mataráskrift?	Yfir 90% mjög ánægðir, ánægðir eða hlutlausir í afstöðu sinni.	Mjög gott.
	Ertu ánægð(ur) með að geta gengið frá mataráskriftinni á Netinu?	Yfir 90% mjög ánægðir, ánægðir eða hlutlausir.	Mjög gott.
	Ertu ánægð(ur) með hvernig þér hefur gengið að skrá áskriftina á Matartorginu?	Yfir 90% mjög ánægðir, ánægðir eða hlutlausir í afstöðu sinni.	Mjög gott.
	Hver finnst þér vera hæfileg lengd á áskriftartímabilum?	Niðurstaða skýr og ljóst að flestir vilja mánaðatímabil eða tveggja mánaða tímabil.	Gott.
	Hver finnst þér vera helsti kosturinn við að nota Matartorgið?	Yfirgnæfandi meirihluti jákvæður. Matartorgið talið vera auðveldur og þægilegur kostur.	Mjög gott.
	Hver finnst þér vera helsti gallinn við að nota Matartorgið?	Nokkrar góðar ábendingar. Erfitt að breyta helstu göllum s.s. að beintengja netbanka.	Gott.
Flokkur	Spurt var um	Niðurstaða	Umsögn
Matur	Hversu ánægt/ánægð telur þú barnið/börnin þitt/þín vera með fjölbreytni réttanna?	Yfir 90% mjög ánægðir, ánægðir eða hlutlausir í afstöðu sinni.	Mjög gott.
	Ertu ánægð(ur) með framboð af ávöxtum á matseðlinum?	82% foreldra og 80% nemenda eru mjög ánægð, ánægð eða hlutlaus í afstöðu sinni.	Ástæða til að bregðast við.
	Ertu ánægð(ur) með framboð af grænmeti á matseðlinum?	80% foreldra og 76% nemenda eru mjög ánægð, ánægð eða hlutlaus í afstöðu sinni.	Ástæða til að bregðast við.
	Ertu ánægð(ur) með bragðgæði réttanna á matseðlinum?	90% mjög ánægðir, ánægðir eða hlutlausir í afstöðu sinni.	Mjög gott.
	Ertu ánægð(ur) með stærð matarskammtana?	79% nemenda og 91% foreldra eru mjög ánægð, ánægð eða hlutlaus í afstöðu sinni.	Ástæða til að bregðast við.
	Hvað rétti finnst þér vanta á matseðilinn (nefndu einn til þrjá)?	Margar góðar ábendingar.	Ástæða til að bregðast við.
	Hvaða réttir finnst þér alls ekki eiga að vera á matseðlinum?	Margar góðar ábendingar.	Ástæða til að bregðast við.
	Ertu ánægð(ur) með næringargildi réttanna á matseðlinum?	84% foreldra eru mjög ánægð, ánægð eða hlutlaus í afstöðu sinni.	Ástæða til að bregðast við.
Matsala	Hversu ánægð(ur) ertu með fjölbreytni varnings í matsölunni?	84% foreldra og 79% nemenda eru mjög ánægð, ánægð eða hlutlaus í afstöðu sinni.	Ástæða til að bregðast við.
	Hversu ánægð(ur) ertu með að boðið sé upp á sætabrauð í matsölunni?	87% nemenda eru mjög ánægðir, ánægðir eða hlutlausir. 44% foreldra eru sama sinnis.	Ástæða til að bregðast við.
	Hvað rétti finnst þér vanta í matsöluna (nefndu einn til þrjá)?	Margar góðar ábendingar.	Ástæða til að bregðast við.
	Hvaða réttir finnst þér alls ekki eiga að vera í boðið í matsölunni?	Margar góðar ábendingar.	Ástæða til að bregðast við.
Annað	Hversu ánægð(ur) ertu með verð á hádegisverðinum?	90% mjög ánægðir, ánægðir eða hlutlausir í afstöðu sinni.	Mjög gott.
	Hversu ánægð(ur) ertu með verð á morgunhressingunni?	Yfir 90% mjög ánægðir, ánægðir eða hlutlausir í afstöðu sinni.	Mjög gott.
	Eitthvað annað sem þú vilt koma á framfæri?	Margar góðar ábendingar.	Ástæða til að bregðast við.

Viðbrögð

Samkvæmt niðurstöðum eru 13 spurningar sem þörf er á að bregðast sérstaklega við. Hér fyrir neðan hafa spurningarnar verið flokkaðar í fimm flokka eftir viðbrögðum. Hugmyndir um viðbrögð eru við hvern flokk.

Hver finnst þér vera hæfileg lengd á áskriftartímabilum?	Nota niðurstöður spurninganna við skipulagningu áskriftartímabila. Ábyrgð: Aðstoðarskólastjóri.
Hver finnst þér vera helsti gallinn við að nota Matartorgið?	Nota niðurstöður við frekari þróunarvinnu í samvinnu við Stefnu ehf. Ábyrgð: Skólastjórn.
Ertu ánægð(ur) með framboð af ávöxtum á matseðlinum? Ertu ánægð(ur) með framboð af grænmeti á matseðlinum? Hvað rétti finnst þér vanta á matseðilinn (nefndu einn til þrjá)? Hvaða réttir finnst þér alls ekki eiga að vera á matseðlinum? Ertu ánægð(ur) með næringargildi réttanna á matseðlinum? Hversu ánægð(ur) ertu með fjölbreytni varnings í matsölunni? Hversu ánægð(ur) ertu með að boðið sé upp á sætabrauð í matsölunni? Hvað rétti finnst þér vanta í matsöluna (nefndu einn til þrjá)? Hvaða réttir finnst þér alls ekki eiga að vera í boði í matsölunni? Ertu ánægð(ur) með stærð matarskammtanna?	Skipa hóp sem fer yfir matseðil og niðurstöður umræddra spurninga. Hópurinn geri tillögur til stýrihóps um breytingar þar sem tekið er tillit til niðurstaðna og viðhorfs nemenda og foreldra/forráðamanna.
Eitthvað annað sem þú vilt koma á framfæri?	Viðfangsefni stýrihóps að fara yfir ábendingar frá foreldrum/forráðamönnum og nemendum.

Lokaorð

Það er mat stýrihópsins að niðurstöður könnunar á viðhorfi nemenda og foreldra/forráðamanna til matarmála í Lindaskóla séu fyrst og fremst gagnlegar. Það er sérstaklega ánægjulegt hversu vel foreldrar/forráðamenn hafa tekið þeirri nýjung að nota Matartorgið til að halda utan um mataráskriftina.

Stýrihópurinn vill þakka öllum þeim sem tóku þátt í könnuninni og lögðu þannig sitt af mörkum til þess að gera þjónustu við nemendur enn betri.

Lindaskóla, mars 2006

Stýrihópur um sjálfsmat

formáli

Efnisyfirlit