Lindaskóli 2011-2012

Frá Skólastjóra

Kæru foreldrar/forráðamenn

Skólahandbók Lindaskóla geymir mikilvægar upplýsingar um flesta þætti skólastarfsins. Það er því nauðsynlegt að þið kynnið ykkur hana vel og hafið hana til hliðsjónar í vetur. Þessi handbók er hluti af skólanámskrá Lindaskóla, sem skiptist í:

·        Handbók Lindaskóla.

·        Námsvísi fyrir hvern árgang sem er að finna hér á síðunni undir Nemendur / Námsvísar og síðan er smellt á viðkomandi árgang.

·        Skóladagatal sem sent er foreldrum í skólabyrjun.

·        Kennara- og starfsmannahandbók Lindaskóla

Það er von okkar, starfsfólks skólans, að þessi handbók verði til þess að efla enn frekar gott samstarf heimila og skólans.

                     Gunnsteinn Sigurðsson

Fjöldi nemenda og skipting í bekki  

Skólaárið 2011 - 2012 eru 555  nemendur í skólanum í 26 bekkjum 

Í 1. bekk eru 38 nemendur í  2  bekkjum

Í 2. bekk eru 53 nemendur í 3  bekkjum

Í 3. bekk eru 52  nemendur í  2  bekkjum

Í 4. bekk eru 47  nemendur í 2  bekkjum

Í 5. bekk eru 43  nemendur í 2 bekkjum

Í 6. bekk eru 59  nemendur í  3 bekkjum

Í 7. bekk eru 58 nemendur í  3  bekkjum

Í 8. bekk eru 52  nemendur í 2 bekkjum

Í 9.bekk eru 72 nemendur í 3 bekkjum

Stjórnskipan Lindaskóla

Skólastjóri ásamt aðstoðarskólastjóra veita skólastarfinu forstöðu og bera ábyrgð á framkvæmd þess.

Skólastjóri: Gunnsteinn Sigurðsson
Aðstoðarskólastjóri: Guðrún G Halldórsdóttir

Í skólanum eru starfandi deildarstjórar. Yngra stigið er 1. – 6. bekkur og eldra stigið er 7.-10. bekkur. Verkefni deildarstjóra er að bæta nám og kennslu í þeim árgöngum nemenda sem falla undir starfssvið hans, samhæfa kennslu og námsefni og vera ráðgefandi um námsefni og vinnubrögð. Guðrún G Halldórsdóttir  er deildarstjóri yngra stigs, Margrét Ármann er deildarstjóri eldra stigs.

Deildarstjórar:
1.- 6. bekkur, aðstoðarskólastjóri Guðrún G Halldórsdóttir
7.-10.bekkur Margrét Ármann 
 

Nú er búið að leggja niður kennararáð og foreldraráð. Nú heitir þetta skólaráð og það skipa skólastjóri, 2 kennarafulltrúar, einn fulltrúi annarra starfsmanna, tveir fulltrúar foreldra og tveir fulltrúar nemenda. Þetta er gert samkvæmt nýsamþykktum grunnskólalögum.
Kosið er í skólaráð til tveggja ára og siðja því í ráðinu í ár þeir sömu og í fyrra.  Arnar Bjarnason og Anna Halldórsdóttir kennarar , fulltrúi annara starfsmanna er Freyja Jónsdóttir
Fulltrúar foreldra eru Sigfríður Sigurðardóttir og Lilja Sæmundsdóttir. Ragnheiður Dagsdóttir er formaður Foreldrafélags.

Fastur fundartími kennara er á miðvikudögum.  Á þessum tíma eru kennarafundir, stigsfundir og annað samstarf kennara. Vikulega hittast kennarar hvers árgangs til að skipuleggja kennsluna og semja vikuáætlanir.

Lindaskóli er einsetinn skóli. Það þýðir að allir nemendur byrja sinn skóladag að morgni og hver bekkur hefur sína stofu. 

Almennar upplýsingar

Helstu símanúmer

Opnunartími
Skólinn er opnaður kl. 7:50 á morgnana. Nemendur geta þá farið inn í sínar stofur, lesið eða lært þar til kennsla hefst. Skilyrði fyrir því að nemendur fái að fara inn í sínar stofur er að þeir sitji í sætum sínum og hafi hljóð. Skrifstofa skólans opnar kl. 7:45 og er opin til kl. 16:00, nema á föstudögum þá er opið til 15:00.

Forföll nemenda
Tekið er við upplýsingum um veikindi og önnur forföll nemenda frá kl. 8:00 dag hvern. Kennari getur gefið nemanda leyfi í einn dag, en ef um lengri tíma er að ræða þarf að sækja um það skriflega á sérstöku eyðublaði (hægt að prenta út hér) og tekur  skólastjóri ákvörðun um leyfisveitingu.
Lindaskóli leggur ríka áherslu á skipulagða útivist og góða gæslu fyrir nemendur, auk þess sem útivistin er vettvangur fyrir nemendur til að njóta sín í frjálsum leik. Hinsvegar getur það komið fyrir alla nemendur að heilsan leyfi ekki mikla útiveru og styðjumst við þá við eftirfarandi vinnureglur.
Meginreglan er sú að nemandi getur verið inni á útivistartíma einn til tvo daga eftir veikindi. Skrifleg beiðni þarf að berast frá foreldrum og bíður nemandi þá inni í sinni stofu á meðan á útivist stendur. Því miður getur skólinn ekki boðið upp á gæslu þessar stundir og því er nemandinn á ábyrgð foreldra ef þeir óska eftir að hann sé inni í útivist. Þar sem þessar undanþágur eru veittar vegna undangenginna veikinda er ekki leyfilegt að aðrir nemendur séu inni.

Stundvísi
Í Lindaskóla er lögð rík áhersla á stundvísi. Óstundvísi er slæmur ósiður sem truflar skólastarf og hefur auk þess áhrif á námsárangur nemenda.

Óveður
Stundum getur skólahald raskast vegna óveðurs. Þá er ætlast til að foreldrar/forráðamenn meti hvort óhætt sé að senda nemendur í skólann. Kennslu er haldið uppi samkvæmt stundaskrá þó fáir nemendur mæti í skólann. Ef veður versnar á skólatíma eru nemendur ekki sendir heim þegar skóla lýkur, heldur látnir bíða í skólanum uns þeir verða sóttir eða þar til veðri slotar.

Viðbrögð skólans vegna óveðurs        Viðbrögð foreldra vegna óveðurs

Skólamáltíðir
Hollt fæði og heilbrigt líferni eru tvö af lykilatriðum til árangurs í námi. Skólinn gefur nemendum í 1. – 7. bekk kost á að kaupa áskrift að morgun- og hádegismat. Nestið, bæði matur og drykkur, er pantað fyrirfram í gegnum síðuna matartorg.is.  Nemendur í 8. – 10. bekk geta einnig verið í áskrift að hádegismat og keypt nesti í mötuneyti nemenda, bæði í útivist og hádegi. Hérna er hægt að skoða matseðil nemenda.

Skólahúsnæði
Stærð Lindaskóla er u.þ.b. 4500 fermetrar, auk íþróttahúss. Í skólanum eru tuttugu og sjö almennar kennslustofur og sex sérgreinastofur. Auk þess er bókasafn og salur með félagsaðstöðu og mötuneyti og íþróttahús. Dægradvöl hefur aðstöðu í lausum húsum á lóð skólans.

Óskilamunir
Nauðsynlegt er að foreldrar merki vandlega allar yfirhafnir, skó og íþróttaföt. Óskilamunir eru í vörslu skólavarða. Vitja má óskilamuna á opnunartíma skólans.

Meðferð kennslubóka
Nemendur fá flestar kennslubækur að láni. Það ætti að vera metnaðarmál hvers nemanda að skila bókum í sama ástandi og hann fékk þær.

Heimanám
Heimanám er einn þáttur í daglegu lífi skólabarna. Í tengslum við það gefst foreldrum gott tækifæri til að fylgjast með námi barnanna og veita þeim stuðning og hvatningu. Áhugi foreldra á skólagöngu barnanna skiptir sköpum fyrir velgengni þeirra í námi. 

Heimsóknir í skólann
Foreldrar/forráðamenn eru ávallt velkomnir í skólann til að fylgjast með námi barna sinna. Foreldrar/forráðamenn eru vinsamlegast beðnir að hringja á undan sér svo hægt sé að gera heimsóknina sem ánægjulegasta.  

Grænfáninn
Landvernd, umhverfisráðherra og 12 grunnskólar á Íslandi hafa efnt til samstarfs um að móta og styrkja umhverfisstefnu og umhverfismennt í skólum undir merkjum Grænfánans. Grænfáninn er umhverfismerki sem nýtur virðingar víða í Evrópu sem tákn um góða fræðslu og umhverfisstefnu í skólum. Skólarnir  sem taka þátt í verkefninu eru dreifðir vítt og breitt um landið og er Lindaskóli  einn þeirra skóla sem tekur þátt í þessu verkefni. Skólarnir eru litlir og stórir með nemendafjölda frá bilinu 30 – 800.  Hérna eru meiri upplýsingar um Grænfánaverkefnið í Lindaskóla.

Starfið í Lindaskóla

Umsjónarkennarar
Allir nemendur í Lindaskóla hafa umsjónarkennara sem gegnir lykilhlutverki í umsjón með nemandanum og samvinnu við foreldra/forráðamenn. Hann fylgist grannt með skólasókn, ástundun og heimavinnu nemandans. Einnig fylgist hann með líðan nemandans og hefur reglulegt samráð við forráðamenn um gengi hans í skólanum. Foreldrar/forráðamenn hafa greiðan aðgang að umsjónarkennaranum, hver kennari hefur fastan viðtalstíma einu sinni í viku auk þess sem koma má skilaboðum til kennara á skrifstofu eða með tölvupósti. Hérna er listi með nöfnum og  netföngum kennara.

Annað starfsfólk Lindaskóla   Hérna er listi með nöfnum og netföngum starfsmanna. (smellið síðan á "Allt starfsfólk í stafrófsröð")

Ritarar
Ritarar sinna margvíslegum störfum við skólann. Þeir þurfa að hafa góða yfirsýn yfir skólastarfið og því er nauðsynlegt að tilkynna allar breytingar og upplýsingar til þeirra, s.s. flutning og komu nýrra nemenda og breytt símanúmer og heimilisföng.

Skólaverðir
Skólaverðir sjá um dagleg þrif í skólanum og eru á vakt í útivist og hádegi. Þeir sjá einnig um að fara með heitan mat í bekki og fara í vettvangsferðir með bekkjum sé þess óskað.

Húsvörður  
Húsvörðu tekur virkan þátt í því uppeldisstarfi sem fer fram innan skólans. Húsvörður sér um að skólahúsnæðið sé opið í upphafi skóladags, hann ber ábyrgð á frágangi húsnæðis í lok skóladags og sinnir almennu viðhaldi.

Bekkjarreglur
Nemendur ásamt umsjónarkennara búa til bekkjarreglur. Þær endurspegla þann starfsanda og samskipti sem nemendur og kennari vilja að ríki í þeirra bekk.

Skipulag starfsins (starfshættir)

Kennarar í hverjum árgangi skipuleggja starfið í samræmi við Aðalnámskrá Grunnskóla. Deildarfundir eru haldnir aðra hverja viku. Þá er fjallað um ýmis sameiginleg skipulagsatriði s.s. þemavikur o.fl.

Samstarf grunnskóla og leikskóla

Kennarar 1. bekkjar eru í samstarfi við leikskólana Dal og Núp. Tilgangur samstarfsins er að kynna skólann fyrir elstu börnum leikskólanna og brúa þannig bilið milli leikskóla og grunnskóla.

Samstarf Lindaskóla og leikskólanna Dals og Núps hefst að vori með sameiginlegum fundi kennara skólanna þar sem heimsóknir næsta skólaárs ásamt námsefni barnanna er rætt, skipulagt og endurmetið. Mikilvægt er að samræmi sé í því námsefni sem tekið er fyrir hjá elstu börnum leikskólans og yngstu börnum grunnskólans.  Foreldrar 5 ára barna fá bréf að hausti með upplýsingum um þau minnisatriði sem gott er að hafa við upphaf skólagöngu.  Samstarf leikskólanna og Lindaskóla felst í gagnkvæmum heimsóknum sem er ein leið til að styrkja tengslin á milli skólastiganna. 

Þegar 1. bekkur kemur í heimsókn í leikskólana er nemendum boðið að vera með elstu börnum leikskólans í valstund. Ákveðin svæði eru í vali, t.d. salur, þar sem reynt er á hreyfifærnina og farið í leiki, listsköpun í Listaskála, byggingaleikur og fleira. Boðið er upp á veitingar sem leikskólabörnin hjálpa til við að framreiða, sungið er saman og 1. bekkur færir börnunum vinakort.  Hér fá börnin tækifæri til að sýna sinn skóla og eru jafnvel að taka á móti  vinum sínum sem voru veturinn áður í leikskólanum.

Elstu börn leikskólanna fara í heimsókn í Lindaskóla.  Þau taka þátt í kennslustund  1. bekkjar og fá þannig innsýn í skólastarfið. Börnin borða nestið sitt og syngja saman, búa til stafinn sinn sem verður hengdur upp þegar þau koma í skólann að hausti, fá vinnuhefti með foræfingum og að lokum færa þau skólabörnunum vinakort. Vinakortið er búið til í vinnustund elstu barna verkefni áður en farið er í heimsókn í Lindaskóla.  Hvert barn sem fer í heimsóknina býr til litla mynd sem er síðan fest inn í sameiginlegt kort sem er skreytt af hópnum. 
Yngsta stig Lindaskóla, 1.– 4. bekkur er með samstund í salnum einu sinni í viku þar sem sungið er saman og einn bekkur er með atriði. Elstu börn leikskólans taka þátt í einni slíkri stund, syngja eða koma með atriði.  
Með vorinu fara elstu börn leikskólans í íþróttasal Lindaskóla, hitta íþróttakennarana og njóta leiðsagnar þeirra og enda á því að fara í sturtu. Leikskólabörnin heimsækja Dægradvöl Lindaskóla á vordögum og kynnast bæði starfseminni og húsnæðinu ásamt starfsfólkinu. Aukin tengsl á milli elstu barna leikskólans og yngstu barna grunnskólans eru gagnleg fyrir báða aldurshópa. Mikilvægt er að vinátta og traust  skapist á milli barnanna, þannig að leikskólabörnin hlakki til að hefja nám í grunnskóla.

Verkefni elstu barna leikskólans Dals - einu sinni í viku eru unnin verkefni úr bókinni Stærðfræði – leikur, þróunarverkefni í leikskólanum Nóaborg.

Verkefni elstu barna leikskólans Núps - eru unnin í hópastarfi einu sinni í viku.  Í hópastarfinu er unnið með þemað Samfélagið og ég. Lögð er áhersla á vettvangsferðir og úrvinnslu úr þeim sem felst í myndsköpun og umræðu.  Einnig er unnið markvisst með hreyfingu.

Verkefni elstu barna leikskólanna Dals og Núps -  eru verkefni úr bókinni Markviss málörvun sem notuð er sem undirbúningur fyrir lestrarnám í fyrsta bekk. Farið er í fjóra fyrstu kaflana:

·         rím, runur og þulur – þjálfa hrynjandi og framburð

·         hlustunar og athyglisleikir  - þjálfa athygli og einbeitingu

·         orð og setningar – börnin læra að málið byggist upp af mislöngum setningum og setningar af mislöngum orðum

·         samstöfur – börnin finna fjölda samstafa með því að klappa hrynjandina í orðunum

     Einnig er unnið með:
            hugtök
            tölur og talnagildi
            formin (hringur, ferhyrningur, þríhyrningur)

  Lögð er áhersla á:
            að börnin verði sjálfstæð
            að börnin geti unnið sjálfstætt
            að börnin geti unnið með öðrum að sameiginlegu verkefni
            að börnin læri að taka á móti fyrirmælum og fara eftir þeim sem einstaklingar og hluti af hópi
            að börnin læri að bíða eftir aðstoð og taka tillit til hvers annars
            að börnin læri að fara eftir ýmsum umgengnisreglum s.s að fara í röð, rétta upp hönd og sitja kyrr.

  Einnig er mikilvægt:
            að börnin vinni krefjandi verkefni, einstaklingslega eða í hópi
            að börnin læri að vinna í stórum hópi
            að börnin æfi einbeitingu og úthald
            að börnin kynnist ýmsum verkfærum, s.s. yddara, strokleðri og reglustiku
            að börnin læri rétt grip á skærum og skriffærum.
        

Í vettvangsferðum læra börnin:  
            að klæða sig eftir veðri og aðstæðum, hvert á að halda
            að fara eftir umferðareglum, reglum hópsins
            að vera í hóp, halda hópinn
            að taka tillit til hvers annars og aðstoða hvert annað.

Krydd í tilveruna
Þrisvar sinnum yfir veturinn er hefðbundin kennsla brotin upp. Þemadagar eru haldnir einu sinni á hverju skólaári (sjá skóladagatal) og er þemað mismunandi hverju sinni. Markmið þemavinnunnar er t.d. að þjálfa nemendur í samvinnu, að efla og mynda tengsl milli nemenda og að auka samkennd meðal nemenda og starfsfólks skólans. Menningardagar eru haldnir síðustu kennsluvikuna í desember. Þá er farið í kirkju, kaffihús sett upp í skólanum og listsýningar skoðaðar. Þá eru einnig haldnar jólatrésskemmtanir þar sem nemendur mæta prúðbúnir í skólann með smákökur og drykk. Kennarar halda stofujól með sínum bekk og síðan hittast nemendur á sal þar sem dansað er í kringum jólatré. Í lok vetrar eru haldnir íþrótta- og útivistardagur, auk þess sem hver árgangur fer saman í vorferðalag. (sjá Vettvangsferðir hér neðar á síðunni)

Samstund
Einu sinni í viku hittast nemendur í 1. – 6. bekk skólans á sal til að syngja saman. Bekkirnir skiptast á að sjá um skemmtiatriði yfir veturinn og eru foreldrar/forráðamenn hvattir til að mæta þegar bekkir barna þeirra skemmta. Á þennan hátt styrkjum við sjálfstraust nemenda og þeir venjast því að koma fram. Fjórum sinnum yfir skólaárið hittast nemendur í 7.-10. bekk og halda veglega samstund.

Vettvangsferðir
Vettvangsferðir og námsferðir eru ríkur þáttur í skólastarfinu. Þá gefst nemendum kostur á að hvíla sig frá námsbókunum og komst út í náttúruna. Hefð hefur skapast fyrir eftirfarandi heimsóknum.

1. bekkur                     Náttúruskoðun í Öskjuhlíð/Heiðmörk/­Guðmundarlundur.

2. bekkur                    Sveitaferð.

3. bekkur                    Mjólkursamsalan, Sorpa Gufunesi

4. bekkur                    Fræðasetrið í Sandgerði.

5. bekkur                     Skíðaferð (ef viðrar), gróðursetningaferð í Guðmundarlund 

6. bekkur                     Skíðaferð (ef viðrar), Reykholt í Borgarfirði.

7. bekkur                     Skólabúðir að Reykjum í Hrútafirði og vorferð á Laugarvatn.

8. bekkur                     Haustferð í Grindarskörð og vorferð á Akranes.

9. bekkur                     Haustferð þar sem gist verður eina nótt. Vorferð á Stokkseyri.

10. bekkur                   Haustferð í Þórsmörk og vorferð (óvissuferð).

Bekkjarskemmtanir  
Í öllum bekkjardeildum er haldnar  1 - 2 bekkjarskemmtanir yfir veturinn þar sem nemendur, foreldrar og kennarar skemmta sér saman. Æskilegt er að frumkvæðið komi frá foreldrum (bekkjarfulltrúum).

Skólabókasafn

Umsjón með bókasafni skólans hefur Solveig H. Gísladóttir bókasafns-og upplýsingafræðingur

Á skólasafninu er ágætt safn fræðirita og barna- og unglingabóka. Þar er einnig að finna myndbönd, spil, hljóðbækur  og geisladiska. Á safninu eru einnig tölvur til verkefnavinnu. Kennarar geta pantað tíma á safninu fyrir bekkinn, ef vinna þarf að ákveðnu verkefni, t.d. heimildavinnu. Skólasafnið er miðstöð skólans í upplýsingaleit og upplýsingamennt. Samkvæmt nýrri Aðalnámskrá Grunnskóla verður upplýsingamennt þverfagleg námsgrein og lögð verður áhersla á kennslu upplýsingalæsis. Það er sú þekking og færni sem þarf til að afla, flokka, vinna úr og miðla upplýsingum á gagnrýninn og skapandi hátt.
Lindasafn, útibú Bókasafns Kópavogs, er í sama húsnæði og skólasafnið og samnýta söfnin safnkostinn að einhverju leyti.

Samstarf heimila og skóla  
Lögð er mikil áhersla á gott samstarf við foreldra/forráðamenn.  Með góðu samstarfi tryggjum við gagnkvæmt traust á milli foreldra og kennara þar sem hagsmunir nemandans er í fyrirrúmi. Skólinn gefur reglulega út fréttabréf með helstu upplýsingum um skólastarfið á hverjum tíma.  Einnig eru sendar út tilkynningar ef þörf þykir.  Upplýsingagjöf til heimilanna fer nú að miklu leyti fram í gegnum MENTOR. Í 1.- 4. bekk eru sendar heim vikulegar heimavinnuáætlanir þar sem ýmsar upplýsingar koma fram.

Foreldraviðtöl með nemendum eru þrisvar yfir veturinn, í nóvember, janúar-febrúar og maí-júní.  Þar gefst tækifæri á að fara yfir stöðu nemandans.

Allir kennarar hafa fastan viðtalstíma og eru foreldrar hvattir til að notfæra sér þá til að ræða öll þau mál sem upp koma varðandi skólagöngu nemandans.

Í hverri bekkjardeild eru nokkrir foreldrar valdir í bekkjarráð. Hlutverk þeirra er að efla góð samskipti á milli foreldra/forráðamanna, nemenda og kennara í bekknum með því að halda a.m.k. einu sinni á ári bekkjarkvöld í samráði við kennara. Einnig eru skipulagðar ferðir utan skóla til að auka fjölbreytni félagsstarfs bekkjarins.

Foreldrafélag
Foreldrafélag Lindaskóla var stofnað 20.október 1999 fyrir tilstuðlan áhugasamra foreldra, en öflugt foreldrafélag er forsenda þess að foreldrar hafi áhrif á skólastarfið. Bekkjarfulltrúar eru tengiliðir milli foreldra, nemenda og foreldrafélagsins. Markmið félagsins er að vinna að velferð nemenda skólans, samvinnu heimila og skóla og almennum framförum í skólastarfi. Félagið vinnur að því að efla kynni foreldra innbyrðis, styrkja menningar- og félagslíf innan skólans, koma á umræðu- og fræðslufundum um uppeldis- og skólamál í samráði við skólann  og koma fram með óskir og tillögur um breytingar. Félagið hefur umsjón með ýmsum uppákomum í skólanum, s.s. laufabrauðsgerð fyrir jólin og vorferð. Árgjald félagsins er 1000 krónur á hvert heimili. Frekari upplýsingar um foreldrafélagið eru undir Foreldrar/Foreldrafélag.

Skólaráð
Nú er búið að leggja niður  kennararáð og foreldraráð. Nú heitir þetta skólaráð og það skipa skólastjóri, 2 kennarafulltrúar, einn fulltrúi annarra starfsmanna,  tveir fulltrúar foreldra og tveir fulltrúar nemenda. Þetta er gert samkvæmt nýsamþykktum grunnskólalögum.

Ástundunarkerfi  unglingastigs   

Sjálfsmat Lindaskóla

Í lögum um grunnskóla (8. mars 1995) er öllum grunnskólum á Íslandi gert skylt að stunda sjálfsmat. 
En hvað er sjálfsmat skóla? Í orðabók er orðið "mat" skýrt þannig að það sé "það að meta gildi eða eiginleika einhvers".
Í tilfelli skólans er þetta framkvæmt þannig að starfsfólk, foreldrar og nemendur skólans leggja mat á gildi og eiginleika skólastarfsins og er tilgangurinn að stuðla að skólaþróun og bættu skólastarfi.
Vinna við sjálfsmat Lindaskóla hófst formlega í ágúst árið 2000. Aðferðin sem notuð er við sjálfsmatið er svonefnd "Kaupmannahafnaraðferð" en hún byggir á þátttöku foreldra, nemenda og starfsmanna skólans.
Unnið var út frá spurningunni: Hvað er góður skóli? Kennarar skólans unnu með þessa spurningu og úr niðurstöðum þeirrar vinnu var útbúinn spurningalisti sem lagður var fyrir starfsfólk skólans. Foreldrar tóku einnig þátt í vinnunni og mættu yfir hundrað foreldrar og tóku þátt og úr niðurstöðum þeirra var útbúinn spurningalisti sem lagður var fyrir foreldra/forráðamenn nemenda skólans. Loks var komið að nemendum að tjá sig um hvað er góður skóli? 1.- 4. bekkur tjáði sig myndrænt og skriflega, 5.- 9. bekkur tjáði sig skriflega (ath. þennan vetur var ekki 10.bekkur)
Niðurstöður úr þessari vinnu voru svo nýttar til gerðar umbótaáætlunar. Í henni fólst að þeir hlutir sem talið var að betur mættu fara voru lagðir fyrir starfsmenn skólans og foreldra. Þessi atriði voru: vinnuaðstaða, skólaskrifstofa, öryggismál, boðleiðir og upplýsingar, reglur, hlutverk starfsmanna, umgengni, samstarf nemenda, námskeið, gagnkvæm virðing og heitur matur.   Þegar starfsmenn og foreldrar unnu með þetta var skipt í vinnuhópa og fékk hver hópur eitt af ofangreindum atriðum til umfjöllunnar og átti að koma fram með hugmyndir að umbótum.

Fulltrúar foreldra í sjálfsmatsvinnu eru Elísa Jónsdóttir og Ragnheiður Dagsdóttir 

Aðgerðaáætlun vegna foreldra 2009

Aðgerðaáætlun 2008

Aðgerðaáætlun vegna kennara 2008.

Niðurstöður úr könnun Dægradvalar 2005-2006

Yfirlit verkefna sem unnin hafa verið í sjálfsmatsferlinu 2003-2006.

Sjálfsmat Lindaskóla, stutt skýrsla unnin vorið 2005

Matartorg.is, könnun á matarmálum.

 "Sanngjarnt námsmat í stærðfræði", unnið 2004-2005

Samantekt á skýrslum tveggja hópa sem unnu að starfendarannsóknum skólaárið 2004-2005

Vinna við sjálfsmat 2003

Úttekt á sjálfsmatsaðferðum Lindaskóla sem framkvæmd var af KHÍ vorið 2002.

Skýrsla stýrihóps um sjálfsmat Lindaskóla sem unnin var í október 2002.

Sérfræðiþjónusta

Náms- og starfsráðgjöf
Hlutverk náms- og starfsráðgjafa er að standa vörð um velferð nemenda, styðja þá og liðsinna í ýmsum málum, bæði þau er varða námið og eins í persónulegum málum. Náms- og starfsráðgjafi í Lindaskóla er Þórhalla Gunnarsdóttir.
Helstu verkefni náms- og starfsráðgjafa eru eftirfarandi:

• Veita nemendum ráðgjöf og fræðslu um nám, störf og atvinnulíf.
• Leiðbeina nemendum um vinnubrögð í námi.
• Veita nemendum ráðgjöf í einkamálum, þannig að þeir eigi auðveldara með að ná settum markmiðum í námi sínu.
• Taka þátt í að skipuleggja náms- og starfsfræðslu í skólanum.
• Undirbúa nemendur undir flutning milli skólastiga.
• Aðstoða nemendur við að gera sér grein fyrir eigin áhugasviðum og meta hæfileika sína raunsætt miðað við nám og störf.
• Sinna fyrirbyggjandi starfi, t.d. vörnum gegn vímuefnum, einelti og ofbeldi í samstarfi við starfsmenn skóla og aðra s.s. starfsmenn skólaskrifstofu og félagsmiðstöðva.

Náms- og starfsráðgjafi vinnur í nánu samstarfi við foreldra eftir því sem vill. Einnig hefur hann samráð og samstarf við aðra sérfræðinga innan eða utan skólans, s.s. sérkennara, hjúkrunarfræðing, skólasálfræðing og vísar málum einstaklinga til þeirra eftir því sem við á. Náms- og starfsráðgjafi skal gæta þagmælsku varðandi málefni skjólstæðinga sinna.

Nemendaverndarráð
Við Lindaskóla er starfandi nemendaverndarráð. Hlutverk nemendaverndarráðs er að samræma skipulag og framkvæmd þjónustu við nemendur varðandi heilsugæslu, námsráðgjöf og sérfræðiþjónustu og vera skólastjóra til aðstoðar við gerð og framkvæmd áætlana um sérstaka aðstoð við nemendur. Í nemendaverndarráði sitja skólastjóri, aðstoðarskólastjóri, námsráðgjafi, fagstjóri sérkennslu og hjúkrunarfræðingur skólans en umsjónarkennari barns er einnig kallaður til ef þurfa þykir.
Öll mál sem nemendaverndarráð fjallar um er farið með sem trúnaðarmál.

Sérkennsla
Í skólastarfinu er lögð áhersla á að allir nemendur fái kennslu við sitt hæfi. Framvinda náms er háð þroskastigi einstaklingsins. Meginmarkmið með sérkennslu er að stuðla að alhliða þroska nemenda, bæði andlegum og líkamlegum. Leitast er við að ná þessu markmiði með jákvæðu viðmóti og virðingu fyrir einstaklingnum um leið og lögð eru fyrir verkefni við hæfi. Sérkennsla felur í sér breytingar á námsmarkmiðum, námsefni, námsaðstæðum og kennsluaðferðum. Hún er skipulögð í lengri eða skemmri tíma eftir þörfum nemandans.
Fyrir hvern nemanda eða nemendahóp í sérkennslu er gerð áætlun sem byggð er á mati á stöðu hans og þroska. Kennt er eftir þeirri áætlun og hún endurskoðuð eftir þörfum. Við leggjum áherslu á fyrirbyggjandi starf í yngstu bekkjunum og nána samvinnu á milli umsjónarkennara og sérkennara. Notuð eru ýmis lestrar- og þroskapróf í 1.-4. bekk. Lögð er sérstök áhersla á lestrarnámið í yngstu bekkjunum , en í skólanum starfa nokkrir menntaðir  sérkennarar. Við hvetjum foreldra/forráðamenn til að hafa samband við sérkennara og kynna sér skipulag sérkennslunnar í skólanum.

Talkennsla

Guðfinna Guðmundsdóttir er talkennari við Lindaskóla. Talkennari hefur fasta viðveru við skólann einn dag í viku, í vetur er það á fimmtudögum. Talkennari kennir nemendum með framburðargalla og aðra talgalla.