Saman í sátt
Skilgreining á einelti
Það telst einelti þegar um ítrekað ofbeldi er að ræða gagnvart sama eða sömu einstaklingum og getur það bæði verið líkamlegt og andlegt. Ójafnvægi er í styrkleikasambandi milli gerenda og þolenda, misbeiting á valdi. Einstök stríðni, ágreiningur eða átök milli jafningja telst ekki til eineltis.
Ferill eineltismála
Tilkynning um einelti
- Ef starfsfólk skólans verður vart við einelti meðal nemenda eða fær tilkynningu um það frá nemendum, forráðamönnum eða öðrum ber að tilkynna það til viðkomandi umsjónarkennara sem tilkynnir deildarstjóra.
- Nemendur og forráðamenn geta tilkynnt um einelti til umsjónarkennara eða deildarstjóra.
- Einnig er hægt að skila eyðublaði á skrifstofu skólans: Linkur á eyðublaðið er hér.
Greining og mat á einelti
Umsjónarkennari greinir málið samkvæmt skilgreiningu skólans á einelti. Hann metur umfang málsins með því að afla upplýsinga hjá þolanda, forráðamönnum hans, nemendum og öðru starfsfólki. Höfum það í huga að málefni er varða einelti geta verið mjög misjöfn og því mikilvægt að skoða vel hvert einstakt mál og vinna samkvæmt því. Áætlunin er rammi sem við styðjumst við.
Aðgerðir umsjónarkennara
-
umsjónarkennari setur aðra kennara þolandans og annað starfsfólk inn í málið.
-
umsjónarkennari ræðir einslega við þolendur og gerendur.
-
umsjónarkennari skrái allar aðgerðir og gæti trúnaðar í meðferð málsins.
Telji umsjónarkennari sig ekki geta leyst málið eða aðgerðir hans bera ekki árangur ber honum að vísa því til nemendaverndarráðs með vitund forráðamanna þolandans.
Fyrirbyggjandi aðgerðir
Lindaskóli hefur frá upphafi lagt áherslu á góð samskipti við forráðamenn þannig að þeir finni sig velkomna í skólanum bæði þegar vel gengur og eins ef eitthvað bjátar á.
-
Nýir nemendur fá sérstakar móttökur hjá deildarstjóra við skólabyrjun. Þeir fá síðan viðtal við náms- og starfsráðgjafa nokkrum vikum eftir skólabyrjun.
-
Hópefli er skipulagt fyrir nemendur, bæði í gegnum kennslu og með skipulögðum ferðum nemenda.
-
Lögð áhersla á að nemendur læri góð samskipti. Öllum nemendum verður að vera ljóst hvað einelti er og að einelti er ekki liðið í Lindaskóla.
-
Nemendur eru hvattir til að láta vita ef þeir vita af nemanda sem verður fyrir einelti.
-
Bekkjarfundir eru haldnir reglulega í öllum árgöngum skólans.
-
Fylgst er með líðan nemenda með könnunum.
-
Á haustfundum er rætt við forráðamenn um mikilvægi þeirra í eineltis- og samskiptamálum.
-
Deildarstjórar og náms- og starfsráðgjafi eru ætíð til aðstoðar í eineltismálum, á hvaða stigi málsins sem er.