Skýrsla um lestrarátak í 2

Skýrsla um lestrarátak í 2. – 7.bekk skólaárið 2009 – 2010

Á vordögum 2009 var ákveðið að Lindaskóli og Hjallaskóli yrðu með þriggja ára þróunarverkefni í lestrarátaki. Verkefnið fékk heitið: Lestrarátak í 2. – 7. bekk .

Þátttakendur:

Deildarstjóri sérkennslu sem er verkefnisstjóri

Deildarstjóri yngra stigs

Umsjónarkennarar í 2. – 7. bekk

Sérkennarar

Nemendur í 2. – 7. bekk

Foreldrar barna í 2. – 7. bekk

Markmiðið er að gera góða lestrarkennslu enn betri og efla áhuga nemenda á lestri. Rannsóknir ýmissa lestrarsérfæðinga s.s Torleiv Højen sem er einn af höfundum LOGOS greiningartækisins sýna að lestrarkunnáttu barna hefur hrakað töluvert og sterkar vísbendingar eru um að margir nemendur hætti að lesa allt of snemma á skólagöngunni. Sérkennarar sem hafa fengið í hendur nýtt greiningartæki í lestri LOGOS, verða varir við að eldri nemendur (8. – 10. bekk) sem eiga í vandræðum með hljóðkerfisvitund eiga einnig oft í ritunarörðugleikum. Þetta bendir einnig til að of snemma sé hætt að efla hljóðkerfisvitund barna en margir skólar gera það markvisst í 1. bekk með kennslu í Markvissri málörvun og síðan ekki söguna meir.

Verkefnið var skráð í Norrænan gagnabanka – Nordisk projektbank og hugmyndin var að fara til Kaupmannahafnar á ráðstefnu í apríl 2010 og kynna lestrarverkefnið. Ekkert varð af því vegna öskunnar í Eyjafjallajökli , ráðstefnan var felld niður. Áætlanir eru uppi um að halda ráðstefnuna í desember 2010.

Verkefnið hófst með kynningu á fundi með kennurum í september 2010 og skiptist það í tvo hluta (fylgiskjal - glærur frá fyrirlestri).

Fyrri hluti verkefnisins heitir víxllestur milli nemenda og foreldra í 3. – 7. bekk. Þessi hluti var unninn í nánu samstarfi við skólabókasafnið. Nemendur völdu sér bók og fengu í hendurnar tvö eintök af sömu bókinni sem þeir fóru með heim og nemendur og foreldrar skiptust á að lesa upphátt. Þetta var allt skráð skipulega niður og lásu nemendur og foreldrar samtals 39.334 blaðsíður og eyddu til þess alls 822 klukkustundum. Sjá töflu.

Nauðsynlegt var að skipta árgöngunum niður á tímabil þar sem ekki eru til nægilega margir bókatitlar í tveimur eintökum fyrir allan okkar nemendafjölda. Skráningar og skil voru mjög góð í yngstu bekkjunum en hrakaði þegar ofar dró. Velta má fyrir sér hver ástæðan fyrir því er. Var kynning til foreldra og nemenda ekki nógu góð, er kennurum yngri bekkjanna tamara að fylgja hlutunum eftir, ætlumst við til of mikillar ábyrgðar af nemendum þegar þeir eldast og þá of fljótt?

Á haustmánuðum var sótt um styrk í Sprotasjóð Menntamálaráðuneytisins og fengust 600. 000 kr. sem nýttar verða til að kaupa fleiri bækur sem notaðar verða í lestrarátakinu. Styrkurinn verður greiddur í áföngum á 3 árum. Einnig var farið í samvinnu við Skólavefinn og erum við að tilraunakenna nýtt heildstætt íslenskuefni í 5. , 6. og 7. bekk . Yfirheiti námsefnisins er: Vanda málið og undirheitin eru : Ekki málið, Minnsta málið og Þetta er málið. Höfundur efnisins er Baldur Hafstað.

Seinni hlutinn var nokkuð frábrugðinn þeim fyrri. Valdar voru ákveðnar lestrarbækur í hverjum árgangi (2. – 6. bek) sem nemendur tóku með sér heim, lásu og unnu tilheyrandi vinnubók. Ætlast var til að nemendur læsu upphátt fyrir einhvern fullorðinn á hverjum virkum degi í tvær til þrjár vikur.

(Fylgiskjöl: foreldrabréf, skráningarblað)

3. og 4. bekkur unnu einnig á skólatíma með þjóðsögur og ævintýri, lestrar- og lesskilningsverkefni.

Stafsetningarátak

Á vormánuðum fór fram stafsetningarátak í 2. – 7. bekk . Nemendur fengu með sér heim valda texta við hæfi hvers árgangs. Fyrimæli voru send heim og áttu nemendur að skrifa nokkrar línur daglega með sóknarskrift og æfa sérstaklega nokkur orð sem voru feitletruð. Við lok verkefnisins voru próf úr feitletruðu orðunum í bekkjunum.

(Fylgiskjöl, foreldrabréf, skráningarblöð)

Myndrænar niðurstöður um lestrar- og stafsetningarátak í Lindaskóla mars- apríl 2010 .

47 nemendur eru í árganginum, 1 nemandi var fjarverandi vegna veikinda og 3 luku ekki við verkefnið.

Prófið var 10 orð.

57 nemendur eru í árganginum, 1 nemandi var fjarverandi vegna veikinda

Lesin var bókin Bras og þras ásamt vinnubók.

49 nemendur eru í árgangnum 6 nemendur luku ekki verkefninu.

Prófið var 47 orð.

49 nemendur eru í árganginum, 2 nemendur voru fjarverandi.

Lesin var bókin Lukkudýrið ásamt vinnubók.

57 nemendur eru í árganginum, 1 nemandi tók ekki þátt og 4 luku ekki verkefninu.

Prófið var 62 orð.

57 nemendur eru í árganginum, 4 nemendur tóku ekki þátt.

Lesin var bókin Loftur og Gullfuglarnir ásamt vinnubók.

55 nemendur eru í árganginum, 46 nemendur luku verkefninu, 9 nemendur luku því ekki.

16 orða próf.

57 nemendur eru í árganginum, 3 nemendur tóku ekki þátt.

Lesin var bókin Allt getur gerst ásamt vinnubók.

53 nemendur eru í árganginum, 3 nemendur luku ekki verkefninu.

57 orða próf.

54 nemendur eru í árganginum, 7 nemendur tóku ekki þátt.

Prófið er 24 orð.

74 nemendur eru í árganginum, 11 nemendur tóku ekki þátt.

Viðbrögð kennara

Verkefnisstjóri hélt fundi með öllum umsjónarkennurum í 2. – 6. bekk og íslenskukennara í 7. bekk. Eftirfarandi lá til grundvallar:

Umræðupunktar vegna lestrarátaks - kennarar

v Fyrirlesturinn í haust - gagnsemi

v Glærurnar

v Verkefnið

v Efnið sem kennarar fengu

v Foreldrabréfin

v Samskipti við nemendur / foreldra

v Árangur

v Framhaldið

v Annað sem kennarar vilja tjá sig um

Svör:

Kennarar 2. bekkjar (Tveir bekkir):

Ø Fyrirlesturinn kveikti í okkur og gott var að skoða glærurnar þegar vantaði meiri upplýsingar. Gott væri að fá kynningu oftar og kynna þá eitt verkefni í einu.

Ø Við vorum með þrjár mismunandi bækur – vantar skýrari reglur um hver fær hvaða bók. Vildum gjarnan hafa lestrarátak að hausti í 2. bekk og stafsetningarátak að vori.

Ø Þarf að leggja stafsetningarverkefnið fyrr fyrir – einnig þarf að athuga prófið betur.

Ø Breyttum foreldrabréfinu svo það félli betur að 2. bekk. Fengum lítil viðbrögð frá foreldrum og nemendur tóku þessu eins og hverju öðru skólaverkefni.

Ø Árangur er góður, þetta er verkefni sem er alveg að gera sig. Erum mjög jákvæðar gagnvart framhaldinu á næstu árum. Þurfum að huga betur að tímasetningum og nauðsynlegt er að hafa verkefnisstjóra sem stýrir og minnir á.

Ø Gaf mér sem foreldri mjög mikið – gæðastundir með barninu.

Svör:

Kennarar 3. bekkjar (Tveir bekkir):

Ø Fyrirlesturinn var gott innlegg í verkefnið og íslenskukennsluna. Notaði glærurnar síðar til að rifja upp.

Ø Verkefnið er vel þess virði að nota – víxllesturinn gekk betur en hitt.

Ø Bókin Bras og þras hentar ekki öllum og óvíst hvort það verkefni var unnið eins og til var ætlast. Viljum fá meira úrval af bókum sérstaklega fyrir duglegri krakkana.

Ø Stafsetningin kveikti í krökkunum. Þurfum aðeins að athuga textana og fyrirmælin betur – 4 daga vikunnar í tvær vikur. Lagfæra fyrirmælin sem fara heim með nemendum.

Ø Samskipti við foreldra og nemendur voru yfirleitt góð – þetta var eina heimavinnan í 2 vikur á vorönn.

Ø Sorglegt hve sumir skiluðu illa á vorönn.

Ø Við gætum séð um þetta sjálfar en mjög gott er að hafa verkefnisstjóra sem kann svör við ýmsu sem kemur upp og getur útskýrt faglega fyrir kennurum og foreldrum.

Ø Erum búnar með allar 10 sögurnar á bókasafninu. Það verkefni er að skila miklu. Notum þetta líka til að endursegja sögurnar. VILJUM MEIRA AF SLÍKU.

Ø Hlökkum til framhaldsins.

Svör:

Kennarar 4. bekkjar (þrír bekkir):

Ø Óþægileg tímasetning á fyrirlestrinum í haust, en hann var daginn fyrir samræmdu prófin.

Ø Verkefnið var fínt, nauðsynlegt að hafa svona. Mætti raða því betur niður á skólaárið. Fasta lestrarátakið okkar féll út.

Ø Víxllesturinn kom best út af þeim verkefnum sem tekin voru fyrir. Hann varð að gæðastund foreldra og barns. Börnin urðu að vinna hitt sjálf. Spurning hvort að stafsetningin skilaði sér. Það mætti stytta prófið, hafa það kannski um 20 orð. Þetta reyndist svolítið maus og nemendur lögðu mismikla vinnu í þetta.

Ø Samskipti við nemendur og foreldra voru almennt góð.

Ø Það verður gaman að sjá lestrareinkunn núna og skoða hvort að marktækur munur sé á árangri.

Ø Verkefnið er gott og veitir aðhald. Nauðsynlegt að hafa verkefnastjóra sem heldur utan um verkefnið.

Ø Væri gott í upphafi að fá pakka með glærunum, foreldrabréfum verkefnum og öllum öðrum upplýsingum.

Ø Bókasafnsverkefnin úr þjóðsögum og ævintýrum voru góð væri gott að fá meira slíkt.

Ø Æskilegt er að stafsetning sé ekki á sama tíma og lesturinn.

Ø Lukkudýrið er of löng bók fyrir flesta í 4. bekk. Mætti gjarnan hafa fleiri bækur í boði miðað við getu hvers og eins. Einnig væri gott að hafa í bréfinu viðmið um það hversu margar blaðsíður á að vinna á hverjum degi.

Ø Benda foreldrum á að hægt sé að beita víxllestri í almennum heimalestri / einkum fyrir slakari nemendur.

Svör:

Kennarar 5. bekkjar (Tveir bekkir):

Ø Fyrirlesturinn var mjög góður – góðar upplýsingar og síðan gott utanumhald – við vorum mataðar með teskeið en það er líka nauðsynlegt að einhver sjái um það. Þurftum lítið að nota glærurnar.

Ø Verkefnið í heild er mikill pakki – annað er lagt til hliðar á meðan. Okkur finnst vera hæfilega langt á milli tarna – en þetta lendir meira á höndum foreldra en skólans þó að við skipuleggjum það.

Ø Þurfum að setja þetta inn í kennsluáætlun að hausti – muna þá að panta tíma á bókasafninu vegna víxllestursins.

Ø Gott væri að hafa stafsetningarprófið tilbúið fyrirfram.

Ø Viðbrögð foreldra mjög jákvæð þó lítil væru. Foreldrar mjög jákvæðir gagnvart víxllestrinum.

Ø Sjáum merkjanlegan mun í stafsetningunni og krökkunum fannst þetta mjög skemmtilegt.

Ø Ekki spurning um að halda þessu áfram – mjög gott utanumhald á þessu og nauðsynlegt að slíkt verði áfram.

Ø Hliðarverkefnið frá Skólavefnum Vanda málið – Þetta er málið: Slepptum goðafræðisögunum – því það var búið að fara í það áður. Sögurnar eru skemmtilegar – góð blanda af ljóðum, frásögnum og sögum. E.t.v. of létt fyrir 5. bekk – en góð upprifjun í heimanámi. Vantar lausnahefti. Ekki þörf á fleiri heftum – notum þetta sem valkost með öðru.

Svör:

Kennarar 6. bekkjar (Tveir bekkir):

Ø Fyrirlesturinn var mjög gagnlegur – ekki þörf á að nýta glærurnar síðar.

Ø Verkefnið gekk mjög vel í heild sinni, alltaf er þó eitthvað um nemendur og foreldra sem skilja ekki eða gera ekki það sem til er ætlast.

Ø Lestrarbókin með vinnubókinni var of létt fyrir marga nemendur. Þyrfti að vera meira úrval af lestrarbókum fyrir árganginn. Árgangurinn er fremur slakur í lestri, margir nemendur með greiningar og lítið að gerast. vantar metnað hjá nemendum (og foreldrum ).

Ø Í stafsetningunni fengu nemendur verkefnin fyrir heila viku í einu – vantar að kennarar hafi betri yfirsýn yfir hvað verið er að gera. Tillaga um að nota heimastafsetningarbók og kennarar skanni hana vikulega. Vantar betra skráningarkerfi í stafsetningunni.

Ø Foreldrabréfin voru góð þurftum aðeins að setja inn rétt bekkjarheiti og dagsetningar.

Ø Mjög jákvæð viðbrögð foreldra við víxllestrinum.

Ø Veltum fyrir okkur hvort allir þurfi að vera í sama verkefni á sama tíma.

Ø Senda bréf til foreldra – hvatning að lesa upphátt.

Ø Við erum mjög jákvæðar fyrir framhaldinu.

Ø Hliðarverkefnið frá Skólavefnum Vanda málið – Ekki málið: Margt mjög gott, sérstaklega vinnubókin. Nemendur gátu unnið þetta sjálfstætt og þurftu oft að geta hugsað út fyrir rammann. Völdum úr lesskilningsverkefnunum – sumt af þessu er mjög þungt fyrir 6. bekk. Bókin Hugarflug er hins vegar of létt – mætti vera fyrir 4. – 5. bekk.

Svör:

Kennari 7. bekkjar (Þrír bekkir – sami kennari kennir íslensku í öllum bekkjunum):

Ø Fyrirlesturinn var fínn, góð kveikja.

Ø Hef ekki notað mér glærurnar síðar.

Ø Verkefnið í heild mjög gott.

Ø Varðandi stafsetningarefnið er nauðsynlegt að skammta það einn strimill á dag. Víxllesturinn fór fram í samstarfi við bókasafnið.

Ø Hliðarverkefnið : Vanda málið – Minnsta málið sem verið er að tilraunakenna fyrir Skólavefinn. Þetta er mjög sniðugt efni, gott í heimanám. Kennsluleiðbeiningarnar komu seint, það vantar blaðsíðutal, ásláttarvillur eru nokkrar, eyðufyllingarnar sumar þungar og snúnar krossgátur. Hef einnig notað Hugaraflsbækurnar frá Skólavefnum en fremur gloppótt. Góð lesskilningsverkefni og nauðsynlegt að æfa það líka.

Ø Lítil viðbrögð hafa borist frá foreldrum. Þeir fáu sem hafa tjáð sig eru mjög ánægðir.

Ø Samviskusamir nemendur lögðu sig fram í þessum verkefnum og hafa örugglega grætt mikið – en skilin voru mjög slök. Þeir sem eru duglegir njóta góðs af en ekki þeir sem slugsa.

Ø Hlakka til framhaldsins í lestrarátakinu.

Viðbrögð foreldra

Tölvupóstur sendur til foreldra í gegnum Mentor.

Lestrarátak Lindaskóla 2009 – 2010

2. – 7. bekkur

Svör frá foreldrum

Subject: Vegna lestrar- og stafsetningarátaks 2. - 7. bekkjar Lindaskóla

Ágætu foreldrar.

Hér fáið þið bréf sem útskýrir ýmislegt varðandi lestrar- og stafsetningarátak Lindaskóla í 2. - 7. bekk.

Einnig fáið þið myndrænar niðurstöður frá hverjum árgangi.

Mér þætti vænt um að þið gæfuð ykkur smá tíma til að skoða þetta og senda mér svör við nokkrum spurningum sem eru neðst í bréfinu.

Kær kveðja og þökk fyrir samstarfið.

Elín Richards

Bréf sent til foreldra í apríl 2010:

Apríl 2010

Kæru foreldrar.

Nú er senn að ljúka fyrsta ári af þróunarverkefninu „Lestrarátak í 2. – 7. bekk í Lindaskóla“. Þetta er mjög viðamikið verkefni sem áætlað er að standi yfir í þrjú ár. Markmiðið er að gera góða lestrarkennslu enn betri og greina fyrr nemendur sem eiga í einhvers konar erfiðleikum með lestur og ritun og veita þeim aðstoð við hæfi. Verkefnið er tilkomið vegna samvinnu Lindaskóla og Hjallaskóla og hafa deildarstjórar sérkennslu í báðum skólunum tekið að sér að stýra því. Við höfum haft af því nokkrar áhyggjur að nemendur hætti að lesa upphátt og sér til ánægju of snemma – jafnvel strax í 5. bekk. Við erum einnig sammála um að í lestrargreiningum ( LOGOS) - erum við að finna allt of marga eldri nemendur sem hafa staðnað í sínu lestrarferli og eiga í erfiðleikum með lestur og ritun þegar kröfur aukast s.s. í tungumálanámi.

Haustið 2009 byrjuðum við með víxllestur nemenda og foreldra í 3. – 7. bekk. Þátttaka yngri barnanna var mjög mikil og skilaði sér rækilega í betri árangri og auknum áhuga á lestri. Því miður dvínaði áhuginn eftir því sem börnin urðu eldri og t.d. var þátttaka 7. bekkjanna frekar döpur.

Eftir áramót lögðum við aftur af stað og nú fékk hver árgangur í 2. – 6. bekk sérstaka lestrarbók ásamt vinnubók og ætlaðar voru 2 – 3 vikur til heimanáms í þeim. Einnig fóru allir árgangar frá 2. – 7. bekk í tveggja vikna átak í stafsetningu / ritun með sóknarskrift þar sem ákveðin, valin orð, voru feitletruð og sérstaklega æfð. Að því loknu tóku nemendur próf úr þessum feitletruðu orðum. Nemendur áætluðu hversu margar villur þeir myndu gera í prófinu.

Síðasti liðurinn í ferlinu í vetur er að kennarar í 5. , 6. og 7. bekkjunum eru að tilraunakenna nýtt námsefni sem Skólavefurinn hefur gefið út. Er það heildstætt íslenskuefni sem tekur á öllum þáttum málsins s.s. : bókmenntum, málfræði, lestri, framsögn, stafsetningu og ritun. Þetta nýja efni ber yfirheitið, Vanda málið og síðan eru heftin fyrir hvern árgang : Þetta er málið, Ekki málið og Minnsta málið.

Til gamans má geta þess að Skólavefurinn stóð fyrir nafnasamkeppni fyrir þetta nýja námsefni og það voru tillögur frá 5. GB í Lindaskóla sem urðu fyrir valinu og nöfnin voru mótuð út frá þeim.

Foreldrum eru færðar kærar þakkir fyrir þeirra framlag til verkefnisins.

Í lokin langar mig að fá viðbrögð frá ykkur foreldrunum varðandi lestrarátakið.

Hvað fannst ykkur um það – urðuð þið vör við átakið eða fór það fram hjá ykkur ?

Var það of lítið, hæfilegt eða of mikið sem ætlast var til í heimanámi ?

Er eitthvað annað sem foreldrar vilja tjá sig um varðandi lestrarátakið ?

Vinsamlega sendið svör til undirritaðrar hið fyrsta og látið koma fram í hvaða árgangi barn ykkar er.

Kær kveðja og þakkir fyrir samstarfið.

Elín Richards – deildarstjóri elric@lindaskoli.is

Svör bárust frá fjölmörgum foreldrum og fara þau hér á eftir:

Hvað fannst ykkur um það – urðuð þið vör við átakið eða fór það fram hjá ykkur ?

Ø Við tókum þátt og ég er alltaf glöð þegar tekið er á málum. (3. og 5. bekkur)

Ø Mér finnst þetta lestrarátak alveg frábært hjá ykkur mætti alveg ná yfir lengri tíma, eins fannst mér að hafa verkefnabók með lestrinum mjög gagnlegt fannst dóttir mín taka betur eftir því sem hún var að lesa og svo fannst okkur báðum mjög gaman af því þegar við áttum að lesa til skiptis. (4. bekkur)

Ø Ég var mikið vör við það og fannst þetta stórsniðugt og eitthvað sem barninu mínu fannst skemmtilegt og hafði áhuga á gera sitt allra besta (2. og 3. bekkur).

Ø Ég var mikið vör við það og fannst þetta stórsniðugt og eitthvað sem barninu mínu fannst skemmtilegt og hafði áhuga á gera sitt allra besta.(2. og 3. bekkur)

Ø Við vorum mjög ánægð með lestrar og stafsetningarátakið. Okkur fannst það hæfilegt en söknuðum þess að hvert barn fengi að nota lestrarbók og vinnubók við sína getu.

Ø Við vorum vel vör við átakið mikil vinna við að lesa og læra. (2. bekkur).

Ø Átakið fór ekki fram hjá mér.

Ø Ég varð rækilega var við átakið hjá stelpu sem við eigum í 3. bekk og þótti þetta frábært framtak. Bæði hvað varðar lestur og ekki síður í stafsetningu.

Ø Urðum að sjálfsögðu vör við þetta.

Ø Hefði mátt vera aðeins meira, frekar stutt.

Ø Okkur fannst átakið heppnast vel, mikill áhugi var hjá nemanda og markmiðið var að klára verkefnið.

Ø Við urðum svo sannarlega vör við átakið. Átakið átt sér stað fyrir þann tíma sem við fengum að vita að dóttir okkar (5. bekkur) með lesblindu en þar sem við vorum jú meðvituð af hennar leserfiðleika fannst okkur þetta tilvalið til að við og dóttirin gætum tekið góða lestraræfingu samt sem áður.

Ø Mjög vör við átakið.

Ø Mér fannst þetta verkefni vera mjög gott og mínum krökkum veitir ekki af svona æfingum.

Ø Ég varð vör við verkefnið og lestrarátakið var tekið hér með trompi.

En skriflegi þátturinn fór heldur illa hjá okkur!!

Ø Ég fylgist alltaf mikið með hvað mitt barn að gera í skólanum og ég varð allveg var við það og tók þátt í því með barninu.

Ø Mér fannst lestraátakið mjög gott. (5. bekkur).

Ø Ég vil lýsa yfir ánægju með þetta átak. Já við urðum svo sannarlega vör við það hér heima og tókum þátt í því með dóttur okkar sem er í 5. bekk. Við foreldrarnir teljum að þetta hafi skilað góðum árangri og hafi verið skemmtilegt, sérstaklega m.t.t. stafsetningar og málskilnings. Verkefnabókin var skemmtileg og umfangið hæfilega mikið.

Ø Þetta var alveg ágætis átak. (2. bekkur)

Ø Mér fannst þetta ljómandi fínt átak. Hefði alveg mátt vera meira krefjandi ef eitthvað er.

Ø Ég var mjög hrifin af lestrarátakinu sem var fyrr í vetur þar sem foreldri og nemandi áttu að skiptast á að lesa.

Ø Mjög jákvætt að hafa svona átak reglulega.(3. bekkur)

Ø Átakið fór ekki fram hjá mér þar sem ég vann það að miklu leiti með syni mínum. Finnst það mjög þarft og gott og tel hans lestraráhuga og getu hafa batnað vegna þess m.a. Þarf á öllum hvötum þar að halda.

Finnst það ekki of lítið miðað við annað heimanám,nokkuð hæfilegt. (2. bekkur).

Var það of lítið, hæfilegt eða of mikið sem ætlast var til í heimanámi ?

Ø Frá mínum bæjardyrum séð var þetta ALLT of lítið (3. og 5. bekkur)

Ø Mér fannst þetta hæfilega mikið mætti eins og ég sagði áðan ná yfir lengri tíma eða hafa þetta oftar á önn.

Ø Mér fannst þetta alveg hæfilegt – sniðugara að hafa minna og þá á hverjum degi. (2. og 3. bekkur).

Ø Hefði mátt áætla daglegan lestur og vinnubók, of opið hvað átti að gera lítið/mikið.

Ø Það var hæfilegt.

Ø Ég held við getum sagt að heimanámið væri alveg hæfilegt.

Ø Hæfilega mikið.

Ø Þetta var hæfilegur skammtur að mínu mati.

Ø Þetta er fín æfing og þau hafa bara gott af þessu. Daman mín reyndi að vísu mikið til að losna frá þessu, enda alls ekki vön að þurfa að læra á hverjum degi. Sem er umhugsunarvert. Við höfum vanið okkur á hingað til að læra allt heimanám um helgar, en ég er ekki frá því að "eitthvað" nám á hverjum degi væri jafnvel betra.

Ø Ég held að þetta hafi verið passlegt, hefði reyndar ekki mátt vera styttra. (2. bekkur)

Ø Mjög hæfilegt. (3 bekkur)

Ø Mér fannst þetta hæfilegt fyrir þetta tímabil en tel að timabilið hefði kannski mátt vera lengra. (2. bekkur.)

Er eitthvað annað sem foreldrar vilja tjá sig um varðandi lestrarátakið ?

Ø Sonurinn er í 3ja bekk og hann lauk bók og vinnubók á fyrsta degi þannig að ég myndi segja að fyrir mín börn, sem ég er svo lánsöm að eiga ekki við námsörðugleika að stríða, þá missti þetta svolítið marks. Það sama er hjá dótturinni sem er í 5.bekk - þeim fannst líka eins og lítið væri úr þeim gert þar sem þau lásu bæði 5. bekkjar bókina í 2. bekk í þeim skóla sem þau koma úr. En þetta var svolítið í stíl við allt annað í skólastarfinu. Þar sem mín skoðun er sú að ef börn eiga við örðugleika að stríða þá eru öll ráð og klær úti sem er frábært og ómetanlegt en ef börnum gengur vel þá er haldið aftur af þeim og þau eiga að bíða eftir að hin nái þeim.

Ø Bara frábært framtak

Ø Langar mest til að lýsa ánægju minni með það.

Ø Mér finnst þetta mjög vert átak og ég var vel vör við það. Þetta var alls ekki of mikið fyrir dóttur mína og höfðum við bara gaman af þessu t.d. þegar að við lásum saman bókina. En ef þetta verkefni hefði verið fyrir nokkrum árum þegar eldri dóttir mín var í skólanum hefði þetta sjálfsagt verið frekar erfitt fyrir hana en á móti hefði hún kannski greinst mun fyrr með lesblindu. Ég vona bara að þetta eigi eftir að hjálpa einhverjum börnum sem eiga við lesörðuleika að stríða Flott framtak (6. bekkur).

Ø Ég fagna þessu lestrarátaki og nýju og breyttu fyrirkomulagi. Ég fékk bréf heim með mínu barni í 2.bekk og las það vel yfir. Að mig minnir var fyrsta vikan í átakinu þemavika í Lindaskóla. Að mínu mati var það frekar óheppilegt. Ég varð til að mynda ekki vör við að átakinu væri fylgt eftir í skóla, tel að það þurfi að vera samspil á milli heimilis og skóla í svona átaki. Svo velti ég þyngdarstigi lestrarbókanna fyrir mér, Alli Nalli reyndist ekki auðveld aflestrar

Ø Mér finnst þetta mjög gott framtak og skilar sér örugglega það er enginn vafi á því. Strákurinn minn er í 3. bekk og gengur mjög vel að lesa en ég tel þetta auka líka áhugann á að þau lesi sjálf bækur fyrir utan námsbækurnar. Mér fannst námsefnið hæfilegt og vona ég að þið haldið áfram á sömu braut.

Ø Tók eftir því að stelpan mín tók miklum framförum og þá sérstaklega í stafsetningu í tengslum við það að foreldrar áttu að velja orð úr texta og nemandinn að skrifa þau upp.

Ø Ég varð aftur á móti lítið var við þetta átak hjá dóttur minni í 7. bekk, enda gengur henni mjög vel í lestri og stafsetningu.

Ø MJÖG gott að taka svona eitt efni fyrir og gott fyrir foreldra að sjá hvar barnið er statt (2. bekkur).

Ø Varðandi átakið í 2. bekk þá fannst mér það sérstaklega áhugavert og gaman að taka þátt í því. Í gegnum það uppgötvaði ég hversu takmarkaður lesskilningurinn er hjá dóttir minni og hversu miklum tíma við höfum verið að eyða í upplestur án nokkurs skilnings. Þetta hefur því breytt upplestrinum hjá okkur í heimanáminu þar sem ég annars vegar stikkprufa hana reglulega um það sem hún les en einnig tókum við upp á því að lesa meira fyrir hana J

Ø Varðandi stafsetninguna þá stendur upp úr hversu skemmtilegt henni fannst að vinna þetta.

Ø Ég hef minna um málið að segja varðandi 7. bekkinn. Við lásum saman eins og gert var ráð fyrir en sú dóttir mín er mikill lestrarhestur og því var lítið um uppgötvanir hvað hana varðar.

Ø Gott átak.

Ø Fyrir mitt leiti fannst mér þetta átak mjög gott, stafsetningahlutinn var flóknari, reynt var að fara eftir þeim fyrirmælum sem upp voru gefin en það reyndist erfiðara að láta barnið fylgja þeim fyrirmælum svo við fundum okkur aðra leið til að ná markmiðinu. Lestrarhlutinn var mjög skemmtilegur.

Ø Mér finnst svona lestrarátak og stafsetningarátak af hinu góða. Er mjög hlynnt þess og sérstaklega ef reynslan af þessu er góð. Á hinn bóginn finnst mér erfitt sem foreldri að finna tíma á hverjum degi til að sinna þessu vel.
Spurning hvort hægt væri að stilla þessu upp þannig að foreldrar fylgist með en þurfi ekki að sitja fast yfir þessu (4. bekkur).

Ø Sonur minn er í 4. bekk eða fæddur árið 2000. Mér fannst átakið hæfilega mikið en hefði þó ekki mátt vera meira að mínu mati. Við vorum annars bara ánægð með það og ég tel nauðsynlegt að koma með þessháttar átak öðruhvoru.

Ø Að öðru leyti erum við mjög ánægð með þá vinnu sem þið hafið lagt í þetta átak. Gott mál.

Ø Hef verið mjög ánægð með lestarátak hjá syni mínum í 4.bekk. Fínt að fá svona átak og okkur fannst þetta mjög skemmtileg og mátulega krefjandi.

Ø Ég lýsi ánægju með verkefnin en ég er foreldri barns í 2. bekk, fannst samt dálítið ruglingslegar leiðbeiningarnar með stafsetningarátakinu.

Ø Við xx vorum sammála um að átakið hefði verið mjög gott og skemmtilegt Átakið var hæfilegt.

Ø Við urðum vel vör við átakið hér. Erum með barn í 5.bekk.

Ø Við fyrstu sýn virtist það vera talsverð vinna sem fylgdi því en það reyndist alls ekki vera svo. Tók skamma stund þegar maður dembdi sér í það.

Ø Við erum foreldarar xx í 2. bekk og xx 7. bekk. Þeir tóku báðir þáttt í þessu átaki og vorum við viljuð til samstarfs (sem ER sjálfsagt). Sáum framfarir hjá þeim og þeir höfðu gott af þessu. Gott átak.

Ø Takk fyrir þessar niðurstöður, gaman að skoða þetta.

Ø Skemmtileg samvinna með barninu.

Ø Dóttir mín er í 6. bekk og við tókum þátt í þessu átaki sem mér fannst alveg hreint frábært. Barnið hafði mjög gott af þessu og ég held að þetta hafi skilað árangri í hennar tilfelli og okkur fannst þetta ekki vera álag ofan á heimanámið, bara skemmtilegt ef eitthvað var, sérstaklega víxllesturinn.

Ø Ég mundi gjarnan vilja fleiri svona stafsetningarverkefni þar sem mínum börn og sérstaklega strákarnir þurfa meiri þjálfun. (6. bekkur)

Ø Okkur fannst þetta verkefni skemmtilegt og lærdómsríkt. XX hafði gaman af því og það jók á sjálfstraust hans.

Ø Mér finnst lestrarátak mjög gott öðruhvoru, já ég varð vör við það.

Ø Lestrarátakið með vinnubókinni var aðeins of mikið hefði verið fínt að hafa bara 1 bls í vinnubók með hverjum kafla ekki 2 bls.(þá var komin þreyta og áhuginn minnkaði, því það var annað heimanám líka) Víxllesturinn var skemmtilegastur hjá mínum syni af þessu (4 bekkur)

Ø Gott og þarft framtak.

Ø Drengurinn minn er í 2. bekk. Hann er ekki allveg orðin læs og verkefnið var því mjög erfitt fyrir hann. Við lásum bókin Labbi labbakútur. Ég gerði reyndar engar athugasemdir við það. Ég þurfti meira og minna að lesa bókina fyrir hann.....þó hann hafi reynt eftir bestu getu að stauta sig fram úr þessu. Reyndar var hann ótrúlega þolinmóður greyið. En þetta var alltof erfið bók. En ég tek það fram að hann er í sérkennslu í lestrinum.

Ø Mitt barn er frekar áhugalaust við lestur þannig að ég var ánægð með þetta (6. bekkur).

Ø Víxllesturinn fannst mér frábær og vel að honum staðið , áhugaverðar bækur sem stráknum mínum fundust mjög skemmtilegar.

Ég hefði valið að víxllestur væri oftar. Seinna verkefnið var líka mjög gott. Ég er mjög ánægð með átakið (5. bekkur).

Ø Ég á barn í 3. bekk og mér fannst lestrarátakið mjög skemmtilegt og gagnlegt. Sérstaklega fannst mér fyrri hluti átaksins skemmtilegur þar sem foreldrar áttu að lesa á móti barninu sínu, það gerði það að verkum að a.m.k. mitt barn áttaði sig á því að það er gaman að lesa bækur, þó þær séu ekki mikið myndskreyttar, auk þess sem við áttum góðan tíma saman á kvöldin við að lesa bókina.

Seinni hluti átaksins var líka bara skemmtilegur og hæfilega mikið til að leysa á hverjum degi. Stafsetningarátakið fannst mér hins vegar ekki nógu skemmtilegt, mér finnst skrítið að barnið eigi að muna setningu utanað og skrifa hana svo niður, og svo að barnið eigi að stafa feitletruðu orðin í stað þess að skrifa þau niður finnst mér líka skrítið...en ég er nú svosem ekki sérfræðingur í stafsetningarkennslu, en mér fannst þetta ganga brösulega með mitt barn í það minnsta. Svo vil ég bæta því við að mér finnst að það eigi að sleppa öðru heimanámi á meðan á átakinu stendur, og jafnvel að hafa lestrarátakið og stafsetningarátakið ekki á sama tíma (3. bekkur).

Ø Sonur minn er í 7. bekk og kom heim með skemmtilega bók sem við lásum saman. Ég þurfti að tala hann til, til að fá hann til að lesa svona til skiptis en þegar við vorum byrjuð þá var það hann sem rak á eftir mér. Mér finnst þetta mjög gott mál, skemmtilegt verkefni. En þeir nemendur sem voru að sinna þessu vel eins og hann , (að mínu mati) fannst mér vanta hrós frá skólanum, mér fannst eins og hann upplifði að það skipti ekki máli hvort hann læsi eða ekki, þegar hann skilaði miðanum að hann hefði lesið var ekkert gert (að hans sögn).

Ø Takk fyrir bréfið og niðurstöðurnar. Mjög fínt að sjá hvernig þetta kemur út með línuritum. Ég á barn í 5.bekk og fannst mér þetta takast mjög vel og vera til góðs. Þau einbeita sér þá að einhverju ákv. verkefni í tiltekinn tíma og það skilar árangri. Mér fannst ekki of mikið heimanán í tengslum við þetta. Lestur er mjög á undanhaldi svo ég held að þetta sé mjög mikilvægt og ætti að vera á hverju ári.

Ø Vildi segja að lestrarátakið hefur haft mikil og góð áhrif á minn dreng sem er í 6. bekk.

Ø Ég er mjög hrifin af þessu átaki og við urðum vel vör við þetta heima því sonur okkur sýndi þessu áhuga. Ég myndi segja að þetta væri hæfilegt mikið hvað varðar tímann sem fór í þetta. Flott framtak (5. bekkur).

Ø Finnst bara mjög jákvætt að leggja áherslu á lestur og stafsetningu og fá foreldrana með í lið (3. bekkur).

Ø Hann las nú alltaf heima fyrir átakið, en eftir að það byrjaði hefur hann aldeilis tekið við sér og er búinn að sporðrenna ótal bókum sem eru allar langar (3-400 bls.) Ég og hann erum búin að lesa saman sex Artemis Fowl bækur, (fyrstu tvær í samlestri, en síðan varð hann svo spenntur að hann þurfti að æða fram úr mömmu sinni). Hann hefur mikið rætt við mig um þessar bækur og núna þegar hann er kominn í aðrar bækur, þarf hann að segja mér frá þeim líka og ég reyni auðvitað að vera voða áhugasöm. Hann fer á safnið og spyr Solveigu hvort hún geti ekki mælt með einhverjum bókum og hún hefur beðið hann að segja öðrum krökkum frá því hvað sé skemmtilegt að lesa. Hann bað Solveigu að láta sig vita þegar næstu Artemis bækur kæmu inn á safn, þegar hann var að lesa þær, hann átti mjög erfitt með að bíða eftir næstu bók.

Mér finnst hann alltaf hafa verið góður í stafsetningu, en lestrarátakið hefur greinilega haft góð áhrif á lesskilninginn og lestraráhugann og mér finnst það hafa verið frábært. Við áttum saman góðar stundir við samlesturinn og ég hef hugsað mér að taka eina bók sem mér var bent á sem heitir Sagan af Po og fékk Booker verðlaunin í kring um 1980 skilst mér og lesa með honum í sumar.

Ég hlakka til næsta lestrarátaks!

Samantekt:

Hvað höfum við lært af þessu ?

Þeir foreldrar, nemendur og kennarar sem tóku þátt í verkefninu eru almennt mjög ánægðir. Foreldrar tala um gæðastundir með börnum sínum og margir merkja verulegar framfarir. Margir foreldrar hafa áttað sig á hversu mikilvægt er að nemendur lesi upphátt fram eftir öllum aldri, bæði þeir sem eru komnir vel á veg sem og þeir sem eiga í einhverjum erfiðleikum með lestur. Bæði foreldrar og kennarar merkja framfarir hjá nemendum í stafsetningu og eru sammála um að það skili sér vel að vinna lítið daglega í nokkurn tíma.

Hverju þarf að breyta fyrir næsta skólaár ?

Útbúa þarf pakka með öllum gögnum, foreldra- og kennarabréfum, tiltaka hvaða bækur eru í boði í hverjum árgangi, útfæra stafsetningarverkefnin og stafsetningarprófin.

Skoða þarf lestrarbækur fyrir 2. og 3. bekk – og jafnvel að hafa meira úrval lestrarbóka í öllum árgöngum. Hafa útskýringar á flokkun bókanna eftir þyngd. Væri hægt að vera með víxllestur oftar yfir skólaárið ? Er nauðsynlegt að gera það sama í öllum árgöngum þ.e. víxllestur fyrir jól og stafsetning og lestur með vinnubók eftir jól. Hugsanlega má víxla þessu hjá einhverjum árgöngum og dreifa þannig álagi á bókasafn og bókakost.

Hægt væri að hafa stuttar kynningar yfir veturinn t.d. á deildarfundum og þá í upphafi hvers átaks. Kennarar gæti jafnvel stýrt tíma sínum og snúið sér til verkefnisstjóra eftir upplýsingum og kynningu.

Kennarar óskuðu eftir fleiri verkefnum úr þjóðsögum og ævintýrum.

Halda þarf góða skráningu yfir hvaða bók hvert barn fær í átakinu ef auka á úrval þeirra. Hugsanlegt er að einhverjar bækur skarist á milli árganga.

Tímastilla betur

Ef allt efnið er tilbúið í upphafi skóalárs geta kennarar sett átakið, bæði lestrar- og stafsetningar, sjálfir inn í kennsluáætlun og skipulagt betur hvenær hvert átak hentar í hverjum árgangi. Nauðsynlegt er að vera í samráði við bókasafnið í víxlestrinum og hafa stafsetninguna í fjóra daga í viku í tvær vikur.

Lagfæra foreldrabréf og upplýsingar

Lagfæra þarf foreldrabréfin þannig að kennarar þurfi eingöngu að setja inn réttan árgang og dagsetningu. Nauðsynlegt er að einfalda stafsetningarfyrirmælin.

Lagfæra þarf stafsetningartextana. Margir þeirra innihalda sömu orðin of oft. Þetta er auðvelt að laga.

Nauðsynlegt er að skammta nemendum einn stafsetningarstrimil á dag.

Hafa þarf stafsetningarprófin tilbúin með hámark 20 orðum fyrir hvern árgang. Finna þarf leiðir til að kennarar fylgist betur með því sem unnið er heima.

Hliðarverkefnið í 5., 6. og 7. bekk, Vanda málið (Þetta er málið, Minnsta málið og Ekki málið) frá Skólavefnum.

Þeir Skólavefsmenn lögðu mikla áherslu á að Lindaskóli og Hjallaskóli sem samstarfsaðilar að lestrarátakinu tækju þessar bækur til nokkurs konar tilraunakennslu. Bækurnar bárust okkur ekki fyrr en en um miðjan mars. Þá er skammt eftir af skólaárinu og ekki mikið svigrúm til ráðstöfunar.

Þrátt fyrir það voru kennarar voru mjög ánægðir með þetta námsefni í stórum dráttum. Þeir gagnrýnu helst smáatriði eins og að blaðsíðutal vanti og að ásláttarvillur væru nokkrar. Kennsluleiðbeiningarnar komu of seint og enn hafa lausnaheftin ekki borist.

Kennarar völdu verkefni úr bókunum og telja að sumt sé of létt og annað of þungt fyrir viðkomandi árgang. Kennarar telja þetta efni góðan valkost með öðru efni.

Lokaorð

Það að stýra þessu verkefni hefur verið mjög gefandi. Yfirleitt ríkir mikil jákvæðni meðal kennara, nemenda og foreldra gagnvart verkefninu.

Í upphafi var runnið nokkuð blint í sjóinn með þróunina.

Á leiðinni var komist að því að ekki gekk allt upp eins og áætlað var. Skortur var á bókum og ekki allt fáanlegt sem fyrst var hugsað og við því þurfti að bregðast. Tímaskortur háði samvinnu Linda- og Hjallaskóla og oft þurfti að redda ýmsu á síðustu stundi sem faglega hefði verið betra að ræða betur og hugsa til enda.

Við höfum lært heilmargt af þessu verkefni og vonandi verður framhaldið Lindaskóla til framdráttar.

Kópavogi 8. júní 2010

Elín Richards